Borgmesterip tullersortaa aatsitassarsiornissamut suliniut pillugu: Malinnaanissaq pissannganarsivoq
Naalakkersuisut Greenland Mineralsip Kuannersuarni aatsitassarsiornissamut suliniutaa tamanut tusarniaassutigaa.
Tusarniaaneq ullumi aallartinneqarpoq – taamaammat kikkut tamarmik oqaaseqaammik ernummatiginninnerminnilluunniit tusarniaanerup nalaani oqaaseqarsinnaapput mailikkullu nassiullugit.
Tusarniaaneq sapaatinik akunnernik aqqanilinnik sivisussuseqarpoq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Naalakkersuisut nunatta kujataani suliniut pillugu innuttaasunut aamma ataatsimiititsiniarput, tamannalu maannamut Kommune Kujallermit tigulluarneqarpoq.
AAMMA ATUARUK Naalakkersuisut aatsitassanik qaqutigoortunik Kuannersuarni suliniut tusarniaassutigigaat
Borgmesterip tullersortaata, Simon Simonsenip (S) suliniut annerusumik tusarfiginissaa nunaqartullu qanoq isumaqarnera tusarnissaa qilanaaraa.
- Pilersaarut soqutiginarlunilu pissanganarpoq, aamma soorunami pingaartitattut taarusuppara tassa Siumumi isumaqaratta, aatsitassarsiorfiit suulluunniit periarfissinneqarsinnaasut ingerlanneqarnissaminnut ammaffigineqarsinnaasut.
- Nunatsinnut, avatangiisinut, innuttaasunut peqqinnermullu akornutaanngitsumik ingerlatsisoqarsinnaappat, taava taanna soorunami periarfissaq atorlugu ingerlatsisoqarsinnaanera pingaaruteqarpoq, Simon Simonsen oqarpoq.
Savaatillit peqatigiiffiillu ernumasut
Suliniutip ukiorpassuarni savaatilinnit Narsamilu innuttaasunut akerlerineqarpoq. Taakku uran aatsitassarsiornerullu illoqarfimmut qanoq sunniuteqarnissaa ernumassutigaat.
Kuannersuarnimi Greenland Mineralsip aatsitassanik qaqutigoortunik piiaaffiginiagaani aatsitassanik qaqutigoortunik uranitalinnik aamma nassaartoqarnikuuvoq.
Savaatillit uumasuutimi qanittuani siunissami aatsitassarsiortoqarnerani inuussutissarsiornertik sussanersoq ernumassutigaat.
AAMMA ATUARUK Savaatillit suliniaqatigiiffillu Kuannersuarni aatsitassarsiortoqalersaarnera ernummatigigaat
Peqatigiiffik Urani Naamik suliniummut aamma ernumassuteqartuuvoq.
Suliniut Narsami innuttaasut ulluinnaanut, peqqinnissaanut pinngortitamullu qanoq sunniuteqassanera pillugu peqatigiiffik paasissutissiiffigineqanngitsoq, Peqatigiiffiup siulittaasuata, Mariane Paviasenip KNR-imut apriilimi oqaatigaa.
Borgmesterip tullersortaata Simon Simonsenip taakku ernummatiminnik tusarniaanermi oqaaseqarnissaat kaammattuutigaa.
- Soorunami inuit kikkulluunniit qanoq isumaqarsinnaapput, aamma tamatta pisinnaatitaaffigivarput tamanna. Oqallineq ammasoq ingerlanniarneqarli, aamma taakkua oqallineq aallaavigalugit qularutiginngilara politikkikkut aalajangertussat aalijangerumaatut, Simon Simonsen oqarpoq.
- Oqallinerit ingerlanneqartussat pissanganarput.
