Naalakkersuisoq aatsitassarsiulersaarnerit pillugit: Itigartitsinissatsinnut piareersimavugut

Naalakkersuisut aatsitassarsiulersaarnermut suliniutit angisuut timitalerneqarataannaasut isumannaallisaanermut piumasaqaatinik sukannersunik naammassinniffiusinnaanngitsutut nalilikkat itigartinnissaannut tunuarsimaanngillat.

Inuussutissarsiornermut aatsitassanullu naalakkersuisoq, Jens-Frederik Nielsen (D), taama nalunaarpoq.

- Aatsitassarsiorneq ulorianarpoq. Taamaammat isumannaallisaalluartoqarsimanera uppernarsarluarneqarsinnaanngippat upalungaarsimanermullu pilersaarusiortoqarluarsimanngippat Naalakkersuisut akuersinavianngilluinnarnerat erseqqissassallugu pingaartippara, taanna KNR-imut oqarpoq.

AAMMA ATUARUK Aatsitassarsiornermik ilisimatusartoq: Upalungaarsimasut ajunaarnersuaqarnissaanut sillimanngillat

Isumannaallisaalluartoqarnissaami nunatta saffiugassanik allanillu qalluinikkut aningaasarsiorluarnissaanit pingaarnerusoq, naalakkersuisoq oqarpoq. 

KNR-ip sillimaffissanik naliliinermik lektori Issittumilu aatsitassarsiornermik maanna ilisimatusartoq Jacob Taarup-Esbensen oqaloqatigereeraalu, naalakkersuisoq taama neriorsuivoq. 

Nunatsinni upalungaarsimasut aatsitassarsiorfissuarmi soorlu Kujataani Killavaat Alannguanni Kuannersuarnilu pilersinneqalersaartunut assingusumi ajutoortoqassagaluarpat iliuuseqarnissamut sillimanngitsut, taanna isumaqarpoq. 

- Kalaallit Nunaanni upalungaarsimasut ajunaarnersuaqarnissaanut massakkorpiaq sillimanngillat. Sulisut atortussallu ikippallaarput. Saputinik ajalusoortoqassagaluarpat, aatsitassarsiorfimmik isasoortoqassagaluarpat akoorutissanilluunniit kuummut nunamulluunniit kuuaartoqassagaluarpat qanoq iliuuseqassanerlutik ataqatigiissaarissanerlutillu ilisimanngilaat, Jacob Taarup-Esbensen KNR-imut oktobarip ulluisa 19-ianni oqarpoq.

Aatsitassarsiorfiit ilinniartitsinissaq akisussaaffigigaat

Nunatsinni aatsitassarsiorfeqareerpoq, Jens-Frederik Nielsenilu taakkunani ajutoortoqarnissaanut aarlerinngilaq. 

- Nunatsinni aatsitassarsiorfioreersuni ajutoortoqarnissaanut upalungaarsimasoqarpugut, naalakkersuisoq oqarpoq. 

Suliniutilli angigaangata aarlerinartortaqangaatsiartarput, inunnillu taakkunani ajutoortoqarnissaanut sillimasoqartariaqartoq, Jacob Taarup-Esbensen isumaqarpoq.

Taamaammat Namminersorlutik Oqartussat kommunilluunniit upalungaarsimasut ilaat immikkut ilinniagaqartariaqassanerannik misissuinissaannut kajumissaarpai - taassumammi nunani allani aatsitassarsiorfissuarniittarnermini suliffeqarfiit ilaat isumannaallisaanermut aningaasaliissuteqarpianngivillutik nunami aatsitassarsiorfeqarfigisaminni upalungaarsimasut isumalluutigisaraat arajutsisimanngilaa. 

AAMMA ATUARUK Jens Immanuelsen aalisarneq Tanbreezillu aatsitassarsiorfissaa pillugit: Akornusersuunnavianngillat

Sisimiuni Aatsitassalerinermik Ilinniarfimmi massakkorpiaq pikkorissaasoqarpoq. Naalakkersuisulli upalungaarsimanermik ilinniarfinnik suli pilersitsilersaanngitsut, Jens-Frederik Nielsen oqarpoq.

Tassa imaappoq, aatsitassarsiorfiit sulisuminnik nammineq ilinniartitsinikkut namminerluunniit akilikkaminnik pikkorissaanikkut upalungaarsimasoqarnissamut akisussaanerpaapput.

- Piginneqatigiiffiit upalungaarsimasoqarnissaanik siullertut qulakkeerinnittussaapput. Suliniutaat Naalakkersuisunit akuerineqartigatik aatsitassarsiulernavianngillat, Jens-Frederik Nielsen oqarpoq.