Aatsitassarsiornermik ilisimatusartoq: Upalungaarsimasut ajunaarnersuaqarnissaanut sillimanngillat
Nunarput saffiugassanik allanillu pilissuuvoq. Tamanna Killavaat Alannguanni Kuannersuarnilu aatsitassarsiulersaarnermut suliniutini angisuuni qangali timitarsineqareerpoq.
Suliniutit taakku suliffissaqartitsillutillu nunatta inuussutissarsiorneranik assigiinngisitaartunngortitsissapput.
AAMMA ATUARUK Jens Immanuelsen aalisarneq Tanbreezillu aatsitassarsiorfissaa pillugit: Akornusersuunnavianngillat
Suliniutilli angigaangata aarlerinartortaqangaatsiartarput. Aatsitassarsiorfik tassani sulisut matoorussaanerannik kinguneqartumik isasoorsinnaavoq. Tassani qarsutsisoqarsinnaavoq maskiinarsuarnilluunniit saffiugassanik allanillu nalituunik piiaassutinik ajutoorujussuartoqarsinnaavoq.
Nunarput ajutoorujussuartoqarnissaanut ilumut sillimanersoq apeqqutaavoq.
Nunatsinni ajunaarnersuaqassappat unammilligassaqassaqisoq, sillimaffissanik naliliinermik ilinniartitsisoq Issittumilu aatsitassarsiornermik maanna ilisimatusartoq Jacob Taarup-Esbensen oqarpoq.
- Kalaallit Nunaanni upalungaarsimasut ajunaarnersuaqarnissaanut massakkorpiaq sillimanngillat. Sulisut atortussallu ikippallaarput. Saputinik ajalusoortoqassagaluarpat, aatsitassarsiorfimmik isasoortoqassagaluarpat akoorutissanilluunniit kuummut nunamulluunniit kuuaartoqassagaluarpat qanoq iliuuseqassanerlutik ataqatigiissaarissanerlutillu ilisimanngilaat, Jacob Taarup-Esbensen KNR-imut oqarpoq.
Ilinniarsimasunik sulisoqartariaqartoq
Nunatsinni ukiorpassuarni aatsitassarsiorfeqareeraluartoq anginerujussuarnik maanna aatsitassarsiorfiliortoqalersaarpoq. Soorlu Killavaat Alannguanni. Aatsitassarsiorfiliornissaq akuerineqassappat inunnik hunnorujukkuutaanik sulisoqassaaq.
Ilisarititsineq
Jacob Taarup-Esbensen nunani tamalaani niuerneq pillugu CBS-imi Ph.D-inngornikuullunilu sillimaffissanik naliliinermik suliffeqarfimmillu ajutoortoqareernerani unittuunnginnissamik Københavns produktionskolemi ilinniartitsisuuvoq.
Aatsitassarsiornermik Armeniami Australiamilu ilisimatusarsimavoq, nunarpullu qitiutillugu Issittumi aatsitassarsiornermi upalungaarsimaneq aningaasaqarnermullu pilersaarusiorneq pillugit ukiuni marlunni ilisimatusaleruttorpoq.
Ilisimatusarnermini Norgemi Stavangerimi ilisimatusarfimmit tapersersorneqarpoq.
Aatsitassarsiorfimmi sulineq ulorianarlunilu ulorianartuaannarnikuusoq puigussanngikkipput, Jacob Taarup-Esbensen oqarpoq.
Nunatsinni issittorsuusarmat, nannut siumorneqarsinnaasarmata silallu pissusia allanngoriartormat, tamakkua sillimaffissanut ilaapput.
Ajutoortoqassagaluarpat nunatsinni upalungaarsimasut nalaassimanngisaannakkaminnik unammilligassarpassuaqartussaapput.
Taamaammat upalungaarsimasut ilaat immikkut ilinniagaqartariaqarnersut Namminersorlutik Oqartussat kommunilluunniit misissortariaqarpaat, aatsitassarsiorfiimmi ilinniartitsinissaat ilisimatusartup oqarnera naapertorlugu ilimananngilaq.
- Suliassaammi qatserisartut suliassaattulli nalinginnaasuunatik immikkut ilisimasaqarfigineqartariaqarput. Taamaammat ajutoortoqassagaluarpat ajunaarnersuaqassagaluarpalluunniit ikiuussinnaasunik immikkut ilinniarsimasunik upalungaarsimasoqartariaqarpoq, Jacob Taarup-Esbensen oqarpoq.
Karrat Kangerluannit eqqaamasat
Upalungaarsimasummi immikkut ilinniarsimasut aatsitassarsiorfeqarfiup eqqaaniiginnarnissaat qanoq qulakkeerneqarsinnaanersoq aamma apeqqutaavoq.
- Ajutoornerit ukiut qulit 30-llu akornannik akuttutigisinnaasarput, taamaammallu immikkut ilinniarsimasut sulisoriinnarnissaat unammilligassaasarpoq, immikkut ilisimasaqarnertik peqqutigerpiarlugu nunatsinni allami suliffissarsisinnaammata, Jacob Taarup-Esbensen oqarpoq.
Nunatta upalungaarsimanini Karrat Kangerluanni 2017-imi tassaarsuaqarnerani misilinneqaatigaa. Nunaqarfiit Nuugaatsiaq Illorsuillu tassaarsuarmit eqqugaammata inuit sisamat ajunaarput, qulingiluat aqqunarput aseruatiterujussuartoqarlunilu.
AAMMA ATUARUK Greenland Mineralsip nalunaarusiaa ASAA-p akuerigaa
Nunatsinni oqartussat pingaarutilinnik taamani ilikkagaqarsimasut, Jacob Taarup-Esbensen isumaqarpoq. Ajutoorfimmut apuunniapiloornartoq aamma upalungaarsimasut atortussallu ikippallaarujussuartut paasivaat.
Taamanikkut silarlunnanilu annaassiniarnermut kipiluttunarsinnaasunik allanik pisoqanngilaq. Taamanikkulli pisumut assingusumik pisoqaqqissagaluarpat taamaattoqaqqinnissaa ilimanaateqarpallaanngilaq.
- Suliffeqarfissuit taamaattut ilisimagaanni, nalunanngilaq ajutuukulasoqartartoq. Taamaattoqassanersoq apeqqutaanngilaq, qaquguli taamaattorumaarnera apeqqutaavoq.
