Upernavimmiut internetti sukkanerusoq atorsinnaalissagaat

Upernaviup tungaanut internettimut attavik naammassineqangajalerpoq, taamaalillutik avannaani najugaqartut internettimut sukkanerusumut atuisinnaalissapput, Telepost taama nalunaaruteqarpoq.
Allattoq Jonas Fievé, Bikki P. Kleist
oktobarip 16-at 2018 19:12

Taamaalilluni Upernavimmi internettimut attaveqaatit sukkanerusut oktobarip naanerani atorneqalersinnaassapput. Tamannalu qilanaarineqarpoq:

- Upernavimmi atuisut internettimut attaviit sukkanerulernerat malugissavaat, internettikkullu filmit soorlu Netfliximeersut isiginnnaarsinnaalissavaat, Telepostimi attaveqaqatigiinnermut suliaqartoq, Paarnaq Hansen oqarpoq. 
 

AAMMA ATUARUK Immap naqqatigut kabeli Aasianni nalliuttorsiutigineqarpoq


Attaveqaatit inerisarneqarnissaannut atatillugu innuttaasut 92 procentiisa missaat 2020-imi internettimut sukkanerusumut attaveqalernissaat, Telepostimit pilersaarutigineqarpoq. 

- Upernavimmi attaveqaatit piareerpata innuttaasut 82 procentii atuisunngorsimassapput, Paarnaq Hansen oqarpoq. 

Internettimut attaviit suliarineqalermata Nuummiit Aasiannut immap naqqatigut kabeli tallineqarpoq, internettikkullu attaveqaatit sukkanerusunngortinneqarlutik.

- Upernavimmiut qilanaartupilussuupput, internettimut attaviit siornali piareertussaagaluarput, apingaatsiarsimanerali pissutigalugu kinguartinneqarsimavoq, taamaattumik attaviit atulernissaat Upernavimmiunit qilanaarineqarpoq, Telepostimi attaveqaqatigiinnermut suliaqartoq, Paarnaq Hansen KNR-imut oqarpoq. 

Immap naqqatigut kabelip Nuummiit Aasiannut 5000 kilometerinik tallineqarsimanera, allaaserisami matumani siusinnerusukkut allassimagaluarpoq. Nuummiilli Aasiannut toqqaannartumik isorartussusaa 500 kilometeriuvoq. Kukkuneq aaqqinneqareerpoq.

AAMMA ATUARUK Sakkortusaaviliorneq silarluttarneranit akornusersorneqartoq

AAMMA ATUARUK Aasaanerani apisarnera pissutaalluni sakkortuusaaveqalernissaq kinguaattoortoq

 

 

Aamma atuaruk