ASSIT Aasaanerani apisarnera pissutaalluni sakkortuusaaveqalernissaq kinguaattoortoq
Upernavimmi internetsi ullumikkut qaammataasatigut attaveqarpoq, Uummannamiillu Upernavimmut sakkortusaaviliornikkut internitsi sukkanerulertussaavoq.
Ukiorli manna tamanna piviusunngunngitsoorpoq. Tassami aasaq manna sakkortusaaveqarfissanik sanaartorneq silarluttarnera pissutaalluni naammassineqarsinnaasimanngilaq. Tele-Post KNR ilisimatitsivoq.
Uummannamiit Upernavimmut sakkortusaaveqarfissat sisamat sananeqartussaagaluarput, pinngortitalli tamanna pinngitsoortippaa.
- Aasaq manna aasaanerlunnera, tassa aasaanerani apinikuullunilu persernikuunera, pissutaalluni suliassat ukioq manna naammassisinnaanngilagut, aappaagulu aatsaat naammassisinnaassalugu, Tele-Postimi attaveqaqatigiinnermut pisortaq, Arnakkuluk Jo Kleist, taama oqarpoq, nagillunilu;
- Maannamut pingasut suliarineqareerput. Sanaartortut maanna uterput, tassami ukiorluinnalermat suliarlu aatsaat aappaagu ingerlaqqissinnaalluni.
Taamaammat Upernavimmiut qaammataasatigut attaveqarallartariaqassapput.
Sakkortusaaviit sisamaasussaapput 2018-milu naammassineqarnissaat Tele-Postip naatsorsuutigaa.
