Upernaaq nillertoq sivisoorlu pissutaalluni eqaluit mikillutillu saluttut
Eqalunniarnerup aallartinneraniilli maannakkut qaammatit marluk qaangiutingajalerput. Maanna aalisakkat kusatsissimallutillu puallarsimapput, kisiannili juunip 15-ianni eqalunniarneq aallartimmat taama isikkoqarsimanngillat.
- Piniagaalernerminni juunip 15-ani suli puallarneqaqqajaratik sisoqqaajorpasillutik salullutik ikillutillu, aalisartoq Anthon Mathæussen KNR-imut taama oqarpoq.
Taassuma eqaluit pisani Nuummi Kalaaliaqqami tuniniartarpai.
Silallu nassatarpassuisa ilaattut silap nillernera eqalunnik salutsitsisimavoq.
Pinngortitaleriffimmi ilisimatusartoq, Rasmus Nygaard, taama nassuiaavoq.
- Upernaaq nillingaatsiarsimagaangat, sikuerneralu kingusilluni, taava eqaluit imaanut sisunerat kingusittarpoq.
- Eqalunniartarnerit piffissami aalajangersimasumiittarmat eqaluit salullutik kusanarnerpaanngitsullu pisarineqartartut inunnit maluginiarneqartarpoq, taanna oqarpoq.
Qaammatialuit ingerlanerini oqimaassutsitik marloriaataannik oqimaallisartut
Eqaluit taseq ukiiffigisarpaat, Eqaluit ukiakkut tasermut majoqqittarput taserlu ukiiffigisarlugu.
Ukiukkullu tatsimiiginnartarput nukissaminnillu katersillutik.
Upernaakkut tatsimi siku aakkaangat eqaluit allinerussagamik puallarseriartorlutillu neriniarlutik imaanut sisusarput. Rasmus Nygaard naapertorlugu allipallattarput. Qaammatini marlunni pingasuniluunniit imaaniikaagamik oqimaassutsitik marloriaataannik oqimaallisarput.
Ukiorli mannatuut upernaaq nillertorujuusimagaangat eqaluit imaanut sisunnginnerminni sivisunermik tatsimiittarput, Rasmus Nygaard nassuiaavoq.
- Taamaammat eqaluit imaanut sisunerat kingusissimatillugu eqalunniarfiup aallartinnerani pisariuminaannerusarput.
Anthon Mathæussen isumaqataavoq. Qujanartumilli eqaluit imaanut sisoreersimapput uumasuaqqanillu naasuarartorlutik aamma aalisagaarartorsimallutik.
- Massakkut kusanartorujussuanngorsimapput, taanna oqarpoq.
Qassutit atorlugit juunip ulluisa 15-ianniit septembarip ulluisa 25-at ilanngullugu eqalunniartoqarsinnaavoq.
