Upalungaarsimasuni pisortap tullersortaa: Nuummi uuliamik kuuttoqarnera aarlerinanngilaq
Nappartaq uuliamik 700 literip missaanik imaqartoq Nuummi pisiniarfiup KK Engrosip eqqaani imaanut ippassaq sisamanngornermi ualikkut nakkarpoq.
Upalungaarsimasuni pisortap tullersortaata KNR-imut tamanna uppernarsarpaa.
Nappartaq uuliamik imalik ippassaq ualikkut nalunaaqutaq ataatsip qaangilaaraa nakkarsimasoq nalunaarutigineqarpoq. Nappartaq piniartut uuliakuutiminnik ikummatissallu sinnikuinik kuisiffigisarpaat.
Nappartap simiisa ilaat iluamik matuneqarsimanngitsoq piaarinaatsoornerinnarmik sakanneqarnerani uulia 700 liiteri imaanut kuuppoq. Upalungaarsimasut uuliamik imaaniit unnukkut nalunaaqutaq qulingiluap tungaanut piiaanasuarput.
Umiatsiat akornanni imaani qanoq uuliaqartiginersoq upalungaarsimasuni pisortap tullersortaata maannamut suli ilisimanngikkallaritsik oqaatigaa.
Suliartilli ullumi ingerlateqqissavaat, pisorlu ernumalernanngitsoq taassuma oqaatigaa.
- Uulia immap naqqanut kivisimappat soorunami aalisakkanut pitsaajunnanngilaq. Qujanartumilli uuliap annerpaartaa imaaniit milluareerparput, upalungaarsimasuni pisortap tullersortaata Jens Mikkelsenip KNR-imut oqaatigaa.
Uuliakuiaanerlu ullup ingerlanerani naammassineqassasoq naatsorsuutigaa.