Nappartaq uuliamik imaqartoq umiarsualivimmi imaanut nakkartoq
Nuummi politiit qatserisartullu nappartamik uuliamik 1000 literip missaanik imalimmik Nuummi umiarsualivimmi imaanit ualimut qaqippaat. Uuliamik aniatitsisoqarsimasoq qatserisartut uppernarsarpaat.
- Nappartaq lastbiilit atorlugit maanna qaqinneqarnialeruttorpoq, pigaartut pisortaat, Malik Olesen oqarpoq.
Allattoq Hanna Vestergaard Hviid
decembarip 14-at 2023 14:27
Nappartaq uuliamik 1000 literip missaanik imaqartoq Nuummi pisiniarfiup KK Engrosip eqqaani imaanut sisamanngornermi ualikkut nakkarpoq.
Kalaallit Nunaanni Politiit pigaartuisa pisortaata, Malik Olesenip KNR-imut tamanna uppernarsarpaa.
Politiit nappartap nakkarfiata nalaani najuullutik assersuipput.
Pigaartut pisortaata qatserisartut innersuussutigai, qatserisartullu imaanut uuliakoortoqarsimanera uppernarsarpaat.
Nappartaq qanoq ililluni imaanut nakkarsimanersoq ilisimaneqanngilaq.
Politiit qatserisartullu sumiiffimmi uuliamut katersileruttortut qatserisartut uppernarsarpaat. Nappartaq lastbiili atorlugu imaanit qaqinneqarpoq.
