Upalungaarsimanermut pisortaq kukkusoqaqqinnerata kingorna: Ajunaarnersuaqarnerani kalerrisaarut tatigineqarsinnaassaaq

Nuummi ajunaarnersuaqarnerani kalerrisaarutip programmererneqarnerani kukkuneq pissutigalugu ippassaq aallartittoq ajuusaarnarluinnartoq Kommuneqarfik Sermersuumit oqaatigineqarpoq.

Allattoq Thor Bill

septembarip 05-at 2023 11:59

Nutserisoq Paornánguak Kleist

Programmeriinermi kukkuneq Nuummi ajunaarnersuaqartillugu kalerrisaarutip ippassaq ualikkut aallartinneranut pissutaavoq.

Taama Kommuneqarfik Sermersuumi upalungaarsimanermut pisortaq Jes Damgaard Andersen oqarpoq. Kukkuneq Nuummi biilinut ikuallattunut ikiuiartornermut atatillugu aallartittoq, oqarpoq.

- Nutaanik attaveqaqatigiinnermut atortoqalernikuuvugut. Atortut nutaat aqqutigalugit kalerrisaarutinik nassiussisoqarmat ajoraluartumik paasinarsivoq pisiffitsinnit kukkusumik programmererneqarsimasoq. Taamaalilluni ajunaarnersuaqartillugu kalerrisaarut ajoraluartumik aallartinneqarpoq.

Tamannalu akuerineqarsinnaanngilluinnartoq upalungaarsimanermut pisortaq kukkuneq pillugu pisiffigisamik oqaloqateqarsimasoq oqarpoq.

Ima pisoqartillugu ajunaarnersuaqartillugu kalerrisaarut aallartinneqarsinnaavoq:

Kalerrisaarutillu kalerriisinneqassappata iliuusissanik tamakkiisumik tullerissakkanik allattorsimaffiit pigineqanngitsut Kalaallit Nunaanni Politiit ilisimatitsissutigaat. Pisumiit pisumorpiaq iliuusissat nalilersorneqartuaannarput.

Inuit amerlasuut inuunerisa navianartorsiortinneqarsinnaanerinik tassanngaannartumillu pisoqartillugu kalerrisaarutit atorneqartarput, tamatumani innuttaasut pinasuartumik ilisimatinneqarnissaanik ilitsersorneqarnissaanillu pisariaqartitseriasaartoqarnerini, upalungaarsimanermik aqutsisoqarfiup, beredskabsstyrelsen, nittartagaani allassimavoq.

Taava politiit aamma tusagassiortunut attaveqassapput, taava KNR-p isiginnaarutikkut raatiukkullu immikkut ittumik aallakaatitsilisssaaq.

Politiillu tamatuma saniatigut innuttaasunik internetti attaveqarpat inoqatinut attaveqaatitigut paasissutissiisasut Brian Thomsenip aamma ilisimatitsissutigaa.

- Soorunami ajuusaartorujussuupput. Programmeriinermimi inuup kukkuneranit pinngorpoq. Taamaammt kukkusimanertik Nuummilu innuttaasut pisariaqanngitsumik ersitinneqarsimanerat imaluunniit ernumatinneqarsimanerat ajuusaarutigeqalugu.

Ukiut aappaata qeqqata ingerlanerani kukkusumik kalerrisaarinerit pingajuat

Nuummi ajunaarnersuaqartillugu kalerrisaarut aatsaat siullerpaamik kukkusumik aallartinneqanngilaq. Siorna kalerrisaarut maajimi aggustimilu tusaaneqarsinnaasimavoq: Sapaammi 14. aggusti ullaakkut arfineq pingasunngunngitsoq illoqarfimmi tusaaneqarsinnaasimavoq. Timmisartoq mittarfimmi isumannaallissaalluni mitsinneqarpoq, kalerrisaarulli qatserisarfimmi politeeqarfimmilu taamaallaat tusaaneqarsinnaasussaagaluarpoq – illoqarfimmi tamarmiunngitsoq.

Taamani teknikkikkut kukkuneq aamma pissutaavoq illoqarfiup qatserisarfittaavani aallartinneqartoq.

Siorna 19. maaji kalerrisaarut aallartimmat, umiarsualiveqarfittaami Qeqertanummi containerit iluanni gassip puui marluk uppissimapput. Containeri gassit puuinik imalik imaarneqarsimavoq, taamaalineranilu palle gaffeltruckimit uppisinneqarsimalluni puullu ilaannit gassi aniasimalluni.

Aamma atuarukAtaatsimut isigalugu: Ajunaalernermi ima kalerrisaarisoqartarpoq

Tamatuma kingorna ajunaanersuaqarnerani kalerrisaarut qatserisartunit aallartinneqarpoq, tamannalu teknikkikkut aamma kukkunerusimasoq Kalaallit Nunaanni Politiit KNR-imut oqarput.

Ajunaarnersuaqarnerani kalerrisaarut aallartippat imaaliussaatit:

Siggarnera siulleq: 'Iserit'

Nippakkiartoriarluni nipikilliartortoq . Siggarnera sekundini 45-ni sivisusseqartoq sisamariarluni uterneqassaaq.

Taava isissaatit, matut, igalaat silaannarissarfiillu matussavatit.
KNR TV-mi radiomiluunniit paasissutissanik misissuigit.
Siggartaatip aappaa utaqqiuk: 'Navianartoq qaangiuppoq'.
Pisortat KNR TV-kkut radiokkulluunniit navianartorsiornermik qaangiuttoqarneranik nalunaaruteqarnissaat utaqqiuk.

Siggarnerata aappaa: 'Navianartoq qaangiuppoq'

Sivisuumik siggartitsitsineq sekundinik 45-nik sivisussusilik.

KNR TV imaluunnit radio navianartup qaangiunneranik nalunaaruteqarpoq.
Maanna illup iluanit aneqqissinnaalerputit.

Tusarfik: Upalungaarsimanermut ataatsimiititaliaq

- Ajunaarnersuaqarnerani kalerrisaarutip aallartinneqarneranut teknikkikkut kukkuneq pissutaavoq. Ikuallattuulernermi nalinginnaasumik kalerrisaarutaasussaasimagaluarpoq, politiit oqarput

Pingasoriaammik misissuissaagut

Taamaattorli upalungaarsimanermut pisortaq Jes Damgaard Andersen oqarpoq, kalerrisaarut aallartinneqaraangat innuttaasunit tatigineqartuassasoq.

- Qaqugukkulluunniit tatigineqassaaq. Kisianni inuit kukkusinnaapput. Matumanilu taamaalisoqarpoq, oqarpoq.

Aamma atuarukAjunaarnersuarmi kalerrisaarut tusaaneqarsinnaanngilaq: Atortut nutaanngililluinnartut

Ilutigitillugu kukkunerit pinngitsoortinniarlugit siunissami iliuuseqarnerusoqassasoq neriorsuutigaa.

- Atortunik pisiffitsinnik annertuumik oqaloqatigiinnerit aallartippagut. Marloriaammik misissuiinnaratik atortut taakkunannga pisiarisimasagut pingasoriaammik misissorneqassapput. Taamannammi pisoqanngilluinnassaaq.

Nuummi Sisimiunilu ajunaarnersuaqartillugu kallerrisaarutit 2019-imi aamma kukkunikkut aallartinneqarput.

Nutaarsiassami kukkunermik nassaarsimaguit uunga allaffigineqarsinnaavugut.