’Amerlasuut Kalaallit Nunaannut Danmarkimullu ajortumik kissaateqartut’: Upalungaarsimanermut nutaamut 180 millionit atorneqangajalersut
Danmarkimi naalakkersuisut nunatsinni upalungaarsimanissamut 180 millionit koruuninik aningaasaliiniarlutik ukiup aallartinnerani saqqummiussipput.
Naalagaaffeqatigiit tamakkerlugit upalungaarsimanermut 1,2 milliardit koruuninik naleqartumik, pilertortumik iliuuseqarnissamut aningaasanik immikkoortitsinermut atatillugu tamanna pivoq.
Kisianni ineqarnermut, attaveqaasersuutinut, isorliunerusunut upalungaarsimanermullu naalakkersuisup Iddimanngiiu Jensen Biancop (IA) oqarnera naapertorlugu, taakku 180 millionit koruunit amerlanerpaartaat atorneqareerput:
- Tassa agguataarnikuupput, sineriammut nassiunneqarnikuupput. Imatut eqqarsaatigalugu tulluarsakkamik, arlaannik upalungaarsimanermut tunngasunik piareersimaffigisassatsinnik inissilluarnikuupput sineriak tamakkerlugu, KNR-imut taama oqarpoq.
Naalakkersuisup Danmarkimi sillimaniarnermut upalungaarsimanermullu ministeri Lisbeth Bech-Nielsen (Socialistisk Folkeparti) nunatta Danmarkillu qanoq suleqatigiinnerulersinnaanerat pillugu sapaammiit marlunngornermut oqaloqatigaa.
Marluullutillu Kalaallit Nunaanni Politiit Issittumilu Sakkutooqarfik pulaarsimavaat aamma Nuummi qatserutaasivik marlunngormat pulaarpaat, tassanilu KNR aamma ilaavoq.
- Ministereqarfima tungaaniit Kalaallit Nunaannit suleqatigiissutigineqarusuttut tamaasa suleqatigiissutigerusuppagut. Sunali pisariaqartinneqarnersoq soorunami tusarniassavarput, Lisbeth Bech-Nielsen oqarpoq.
Qarasaasiatigut isumannaallisaaneq aningaasallu amerlanerusut
Kommuneqarfik Sermersooq qarasaasiatigut ukioq manna ajutoorujussuarpoq, tamannalu innuttaasut qarasaasiakkut ikiorserneqarsinnaanatillu kommunip nalinginnaasumik normuinut sapaatit akunnerpassuini sianertoqarsinnaasimanngilaq.
Tamannalu suleqatigiinnissap sooq pingaaruteqartigineranut assersuutaalluarpoq, Danmarkimi ministeri isumaqarpoq:
- Danmarkimi aamma ajutoortoqartuaannarpoq. Teknologiit soorlu AI-mut kvanteteknologiimullu tunngasut ajutuukulaarnerulerput, Lisbeth Bech-Nielsen oqarpoq:
- Ajoraluartumik amerlasuut Danmarkimut Kalaallit Nunaannullu ajortumik kissaateqarput, taamaammat ullut tamaasa saassunneqartarpugut. Annertoorujussuarmik suliniuteqartoqartariaqarpoq taamaattumillu immitsinnut ilinniarlutalu misilittakkatsinnik avitseqatigiittariaqarpugut. Isumaqarpungalu tamanna pillugu siuariartorluarluta.
Taassuma Danmarkimiit upalungaarsimanermut aningaasaliisoqaqqinnissaanut periarfissaqarnerarpaa.
- Danmarkip, Kalaallit Nunaata naalagaaffeqatigiinnerullu sapinngisamik nukittuujunissaat tamatta kissaatigaarput. Taamaattumik iliuuseqarnerput Danmarkimut pitsaasuuvoq, Lisbeth Bech-Nielsen oqarpoq:
- Isumaqarpunga ataatsimoorussanik amerlanernik isumaqatigiissuteqarumaarluta, taakkunani qanoq ikioqatigiissinnaanerluta suullu aningaasaliiffigineqarsinnaanersut eqqarsaatigisassallugu.
Ilinniartitaaneq pitsaanerusoq
Lisbeth Bech-Nielsenip Iddimanngiiu Jensen Biancollu marluullutik, nunatta suleqatigiinnermut arlalinnik tapiissuteqarsinnaanera erseqqissaatigaat.
Danmarkimi ministerip nunatsinnut taama angitigisumut inukitsumulli upalungaarsimaneq eqqarsaatigalugu annertuumik suliniuteqartoqartariaqarnera immikkut erseqqissaatigaa.
- Takusinnaagatsigu immitsinnut tunniusseqatigiissinnaalluta suleqatigiinnitsinni soorunalimi danskit suleqataanerat uatsinnut isumaqartorujussuuvoq, Iddimanngiiu Jensen Bianco oqarpoq:
- Taamaakkaluartoq aamma takusinnaalernikuuarput uagut aamma arlaatigut danskinut suleqateqarsinnaanerput qanoq iluaqutaasinnaatiginersoq. Taamaattumik nukittorsarnissarput immitsinnut taanna immaqa annerpaamik ulluni kingullerni eqqartorparput.
Ministerip naalakkersuisullu Nuummi qatserutaasivimmiinneranni, naalakkersuisoq aperaarput, sineriammi qatserisartut pillugit ajornartorsiutit, ministerilu eqqartorsimaneraat.
- Tamakku aamma eqqartorpagut. Ilaatigut aamma kommunit akisussaaffigimmassuk. Uagut aamma tassuuna qanoq suleqatigiinnerusinnaanerluta eqqartorpagut, Iddimanngiiu Jensen Bianco oqarpoq:
- Sorpassuit iserfigivagut aamma ajornartorsiutit ilinniarsimanikkut suullu atorfissaqartinnerivut nunatsinni qaffasissumik inissisimalissagutta, qatserisarfik kisiat eqqaaginnassagaanni..
Taassuma 180 millionit koruunit tamaasa atorneqarsimannginneri oqaatigaa.
- Ilaatigut kingulliit inissiffissaat isumaqatigiissutigissavagut ilai inissereernikuupput. Taakkulu aamma tulluarsarnissai allallu pisariaqartitaat tusarnaarpaat. Ilaatigut ilinniarnermut tunngasut eqqaavagut, kisianni tamakkiisumik inissivinnikuunngillat suli Iddimanngiiu Jensen Bianco oqarpoq.
