Maajip ulluisa 20-anni ikuallannerup aallartiffiani Ilulissat seqinnarippoq. Taamaammat seqernup kissarnera eqqagassanut ikuallassinnaasunut eqquisimanera pissutaasinnaasoq, Jens Dahl oqarpoq.Assi: KNR / Paninnguaq Steenholdt

Upalungaarsimanermi pisortaq: Ilulissani eqqaavissuup ikuallatsinneqarsimannginnissaa qularutiginngilara

Ilulissani upalungaarsimasut politiillu eqqaavissuaq ikuallakkunnaarpat qanoq ikuallalersimanera misissorniarpaat. Ikuallalerneranulli pissutaasoq paasiniassallugu ajornassasoq, Avannaata Kommuniani upalungaarsimanermi pisortaq oqarpoq.

Ilulissani eqqaavissuaq sapaatit-akunneri marluk sinnerlugit ikuallappoq. Soorli ikuallannera suli ilisimaneqanngilaq.

Ikuallatsitsisoqarsimanissaali Avannaata Kommuniani upalungaarsimanermut pisortap, Jens Dahlip ilimaginngilaa.

- Tassa assigiinngitsorpassuarnik pissuteqarsinnaavoq. Tassa taamatut oqarnernut pissutaavoq qanoq pisoqarnera suli nalugatsigu. Kisianni kissaq arlaatigut pilersinneqarsimasinnaavoq, uku eqqakkat tassanngaaneersinnaasinnaavoq.

- Kukunneqarsimasinnaanera taanna taamaattoqanngiivippoq, upalungaarsimasut pisortaat oqarpoq.

AAMMA ATUARUK Dag 13 med dumpbrand i Ilulissat: Meget trætte brandfolk

Eqqaavissuarmi sulisut marluk eqqaavissuaq maajip ulluisa 20-anni pingasunngornermi nalunaaqutaq aqqanermut qimappaat. Sulisut marluk nakkutiginnittuusut sumiiffik qimaleramikku allanartumik takusaqanngillaq. Eqqaavissuarmit pujornera nalunaaqutaq 11.30 takuneqarpoq.

Eqqaavissuaq qimalerassiuk inoqarsimasinnaanngila?

- Apuunnitsinni apuukkiartornitsinni taava taamatut aqqusinermiit tassunga eqqaavissuup tungaanut takkajaalaarpoq, saneraatungaanullu soorlu qiviaraanni sumilluunniit inoqanngiivissoq, aamma qanittukkut eqqakkanik igitsisoqarsimaneranik taakkua sulisut qularutiginngiivippaat taamatut takkuttoqarsimanavianngitsoq, Jens Dahl oqarpoq.

Maajip ulluisa 20-anni ikuallannerup aallartiffiani Ilulissat seqinnarippoq. Taamaammat seqernup kissarnera eqqagassanut ikuallassinnaasunut eqquisimanera pissutaasinnaasoq, Jens Dahl oqarpoq.

Inuit pissutaasorisaat

Upalungaarsimanermut pisortap ikuallanneq inuusuttunit aallartinneqarsimasinnaasoq illoqarfimmit inunnit tusarpaa.

- Suu eqqortuunngilaq aamma taannaq. Qulakkiivillugu imatutut qulakkiivinngikkaluarlugu oqaatigisinnaavara piaaraluni ikuallatsinneqarnikkut taanna aallartinneqarsimanngilaq, upalungaarsimanermut pisortaq oqarpoq.

Aammattaaq taassuma immikkoortortaqarfianneersut eqqaavissuarmi ikuallattoqarnissaanut sungiusarnerminni namminneerlutik ikuallatsitsisimasut pasilliutigineqarpoq. Tusatsiakkalli taassuma eqqunngitsuunerarpaa.

- Tassa taannarpiaq tusartarpara. Tassa eqqortuuvoq taamanikkut aallartinnerata nalaani maani tunngaviusumik sungiusarneq maani ingerlassimavarput, pikkorissarnerannut sumilluunniit attuumassuteqanngilaq, Jens Dahl oqarpoq.

- Immikkut sungiusartarpugut ikuallaassagaangatta, taannalu eqqaavissuarminngaanniit avinngarusimasorujussuulluni.

Jens Dahlip politiit peqatigalugit ikuallattoq nilloreerpat ikuallattoqalerneranut pissutaasoq misissorniarpaat,

- Ikuallattumik suli qamisaasoqarpoq, ikuallannerlu qamissimaleriarpat suliaq upalungaarsimasimasut pisortaat peqatigalugu naliliiffigissavarput, Ilulissani politikommisæri Palu Petersen oqarpoq.

Pissutaasulli paasiniarnissaa ikuallangaatsiartoqarnikuunera pissutigalugu ajornakusuussagunarpoq. Assaasoqarlunilu nivattaassuit atorlugit eqqakkanik nikiterisoqarnikuuvoq, tamannalu misissuinermut ajornarnerulersitsissaaq, upalungaarsimanermut pisortaq oqarpoq.

Uuliakooruteqanngitsoq

Uuliakumik tonsikkuutaartumik eqqaavissuarmiittoqartoq KNR-ip siusinnerusukkut oqaluttuaraa. Immersakkalli uuliamik imaqarsimasut maannali imaqanngitsut pineqarput. Taamaammat tonsikkuutaartumik uuliakoqanngilaq.

AAMMA ATUARUK Brand i Ilulissat: Gammelt jernskrot gør slukning svær

Uuliakoq pillugu nalunaaruteqarneq upalungaarsimanermut pisortaq tulliata Avannaata Kommunianilu ingerlatsinermut immikkoortortaqarfiup akornanni paatsoortoqarneratigut pivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat