Ilulissani eqqaavissuaq ullut 13-issaanni ikuallattoq: Qatserisartut qasoqqaqisut

Ilulissani qatserisartut eqqaavissuaq ikuallattoq qamisarniarlugu pingasunngornermi maajip ulluisa 20-annili ulloq unnuarlu ulaputtuarsinnarput.

Eqqaavissuaq maanna ullut 14-issaanni ikuallappoq, qatserisartullu qasoqqapput. Innuttaasunilli qujanartumik ikiuuttoqartoq, Avannaata Kommuniata upalungaarsimatitaasa pisortaat, Jens Dahl, tusagassiorfinnut nalunaarpoq:

- Qatserisartut qasoqqaqisut saniatigut, illoqarfimmi namminneq kajumissutsiminnik ikiuukkiat uagut qatserisartortatsinnut ikuallannermiittunut oqilisaassilluarsimaqisunik ikiuulluarsimaqaat.

Air Greenland qulimiguuliutini AS-350-eq atorlugu aamma ikiuuppoq, eqqaavissuarlu ikuallattoq immamit imermik tarajuusumik qulimiguulimmiit kuerarneqarpoq.

- Qulimiguulimmi ingerlatsisutta qattaq angisooq, ikuallattunut qatserutit nalinginnaasut atorlugit tikikkuminaatsunut, imermik angisuumik siaruarterinermut atorpaat, Air Greenland Facebookimi allappoq.

Anorip saqeqattaarnera qamisaanermik sivitsorsaataasoq

Anorip saqeqattaarnera qamisaanermi ajornartorsiortitsinerpaasoq, upalungaarsimatitat pisortaat oqarpoq.

- Taamaammat qatserisartut nutaamik qatseriffissarsiniarlutik illuaqattaartariaqarput.

- Taamaammat silaannaq kissartumut aamma pigaangami uunnarujussuartarpoq ikummaríssititsilertarlunilu.

Eqqaavissuarmi ersittuni tamani ikuallassinnaasut ikumareerput, eqqaavissuulli naqqani kissartoqarfiit uunaqisut tikikkuminaannerpaapput.

 - Taakku tassaapput eqqakkat ukiut ingerlanerini sioqqanik qallersorneqartarsimasut, taamaalilluni ikiariissitaalersimallutik. Taamaattumik uunartoq tamakku pissutigalugit tikikkuminaaqaaq.

Suli qanoq sivisutigisumik qamisaasoqassava? 

Anori avannaq kippasimmut saqigaangat illoqarfik pujulersarpoq. Tamanna innuttaasunut iluaalliutaasaqaaq.

Eqqaavissuarlu ikuallattoq qaqugorpiaq qaminneqassanersoq, ulapungaarsimatitat pisortaata oqaatigisinnaanngikkallarpaa.

- Suli qanoq sivisutigisumik qamisaasoqassanersoq tamakku patsisigalugit oqaatigiuminaappoq. Oqaatigineqareersutulli kissarneq annertooq maanna annikillisikkiartuaarneqarpoq, taamaalilluni anikitsuinnaq nillusagassanngorluni.

Jens Dahlip Ilulissani innuttaasut naammagittarnerannut iluatsillugu qutsavigai:

- Aamma Ilulissani innuttaasunut qujanarujussuaq, pisup ilaani annertuumik paasinnimmata. Aamma paasisinnaalluarpakka pujormiuullutik iluaalliutaannut, aammali nassuerutigisariaqarlugu, iliuusissagut tamaasa atorlugit, qamisaaniarneq ajornakusooqisoq, sapinngisamik piaarnerpaamik, naammassiniarsarigatsigu.