Niels Nielsen Nuummi Unnuarissani siulittaasuuvoq, taassumalu amerlanerusut nammineq kajumissutsiminnik suleqataalernissaat kissaatigaa.Assi: KNR

Unnuarissat meeqqat persuttaasarnerat pillugu: Ataatsikkut sumiiffinni assigiinngitsuniissinnaanngilagut

Nuummi Unnuarissat meeqqat akornanni nakuusertoqarneranik pinaveersaartitsinissamut nammineq kajumissutsiminnik suliaqartunik qassiiusunik pisariaqartitsisut, siulittaasoq oqarpoq.

Meeqqat meeqqanut allanut persuttaanerat pillugu suliaq amerliartortut politiit meeqqat illersuisuatalu maluginiarpaat.

Sakkortuumillu iliuuseqarnerit pingaartumik Nuummi qassiiupput.

AAMMA ATUARUK Meeqqat illersuisuat: Meeqqanut persuttaasoqartarnera ernumanartumik takussaaleraluttuinnarpoq

Nuummili Unnuarissat immikkoortortaqarfiata persuttaasoqarnera naammattoornikuunngilaat.

- Misiginikuunngilarput. Imaassinnaavoq aamma sungaartunik kavaajallit pingasut takkukkaangata allamukartartut. Aammami eqqaaniikkaluarutta persuttaanissaat ilimaginngilara.  Naammattuugaqaruttali inerterissaagut, siulittaasoq, Niels Nielsen oqarpoq.

  • Nuummi Unnuarissat 2000-imi pilersinneqarput
  • Unnuarissat meeqqanut inuusuttunullu toqqissisimanermik pilersitsinissaq anguniagaraat.
  • Unnuarissat arnat angutillu eqimattani pingasukkaarlutik sungaartumik kavaajalerlutik ingerlajuaannarput.
  • Unnuarissat angalaarnerat naliginnaasumik akunnernik pingasunit sisamanut sivisussuseqartarpoq. 

 

Paasissutissarsiffik: nuuk.natteravnene.dk

Nuummi Unnuarissani nammineq kajumissutsiminnik suliaqartut maanna 23-upput. Meeqqallu nakuusertarnerat pinaveersaartinneqassappat kavaajat nammineq qaamasartut amerlanerusut unnuaanerani pisariaqartinneqartut Niels Nielsenip erseqqissaatigaa.

- Pisoqatigiit ataasiinaanngitsut illoqarfimmi angalaartittaraluarutsigit pitsaanerpaassagaluarpoq, assersuutigalugumi ataatsikkut Nuummiillutalu Nuussuarmiissinnaalissagaluarpugut. Taamaaliorsinnaalissaguttali Unnuarissat amerlanerusariaqarpugut.

Persuttaasoqarnera pillugu nalunaarfigineqartut

Severine S. Jensenip ernera aqqaneq-marlunnik ukiulik Nuummi illoqarfiup qeqqani inuusuttunit allanit qulit missaanniittunit persuttarneqartoq KNR-imit siusinnerusukkut saqqummiupparput.

Taanna tukertarneqarlunilu annersittarneqarpoq, tamatumalu kingunerisaanik annikitsumik qaratsamigut sajuppillatsitsilluni. 

AAMMA ATUARUK Severinep ernera saassunneqartoq: Anaanatut ernumanarpoq kamaammernarlunilu

Unnuarissat suliaq taanna pillugu unnuk taanna tusagaqarsimasut Niels Nielsenip oqaatigaa.

- Tallimanngornermi tassani meeraq annersarneqarmat Qinngutsinniippugut. Kingornalu maanga Nuummukarluta. Pisunnitsinni nukappiaqqat ilaasa arnaata attavigaatigut. Kisianni taamaalinerani pisoq qaangiutereerpoq. Ataatsikkummi sumiiffinni assigiinngitsuniissinnaanngilagut.

Angajoqqaat ernumasut politikerillu meeqqat nakuusertarnerat piffissam kingullermi iliuuseqarfiginiarsaraat.

Nuummi unnummi oqallittoqarpoq, tassani aaqqiissutissat oqallisigineqarput, ataatsimiinnermillu allamik sapaatip akunnerata tullianut aamma pilersaaruteqartoqarluni.

Kommuneqarfik Sermersuumi borgmesterip, Charlotte Ludvigsenip (IA) kommunip meeqqanut inuusuttunullu siunnersuisut amerlanerusut unnukkut nakkutiginnittalersissagai aamma neriorsuutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat