Severinep ernera saassunneqartoq: Anaanatut ernumanarpoq kamaammernarlunilu
- Aqqutaani persariinnavillugu nasaartaqattaarlugu aaqqatai tigusaqattaarlugit taavalu sakkortuumik ajattaqattaarpaat, nukappiaqqamut aqqaneq marlunnut ukiulimmut, anaanaasoq, Severine S. Jensen taama oqaluttuarpoq.
Nukappiaraq sapaatit akunnerata siuliani unnukkut arfineq pingasut missaani kammalaatini ilagalugit, angerlartilluni nukappiaqqanit quliusunit malersorneqalerami pisut taamatut aallartipput.
Nukappiaraq saassunneqarpoq, kammalaataalli saassunneqarnissaminnik annilaangallutik iliuuseqarsinnaasimanngillat.
- Qitiatigut kiinaatigut niaquatigut annersarpaat taava tassani ernera annerpoq, qitimigut anniartalerpoq taavalu qutumigut ippigisaqarluni annerisarlugu niaqqumigullu anniartarluni.
Qaratsmigut sajuppillatsitsisoq
Pisut kingorna nukappiaqqap kammalaatini ilagalugit politeeqarfiliarsinnaasimapput, kingornalu angajoqqaat attaveqarfigineqarmata, anaanaasoq tupassimaqaaq.
- Kingunitsianngua niaqorluppoq merianngullunilu sajuppillatsitsilaarsimalluni qujanartumi annertunerusumik pisoqanngilaq.
AAMMA ATUARUK Tusagassiorfik: Inuit marluk 14-nik ukiulimmut peqqarniitsumik saassussisimasutut pasineqartut
Meeqqat illersuisuat, Aviâja Egede Lynge, Kalaallit Nunaannilu Politiit, pisunut assingusunut Nuummi, Qaqortumi Ilulissanilu arlalinni suliaqarlutik, KNR-imut ippassaq, uppernarsarpaat.
- Piffissaq kingulleq ingammik, meeqqat meeraqatiminnik sakkortoorujussuarmik pissusilersortut. Tassa timikkut tarnikkullu persuttaaneq, ajoraluartumik meeraqatiminnut atoraat ernumassutigineqarluni saaffiginnissutaasarpoq. Taakku saniatigut aamma uagut nammineq malinnaanertigut takuneqarsinnaalluni.
Meeqqat illersuisuat, Aviâja Egede Lynge oqarpoq. Taassuma oqarnera naapertorlugu, meeqqat arlaqartut saassunneqarsimallutik saaffiginnittartut amerliartorput.
Nalinginnaaleraluttuinnartoq taanna Kalaallit Nunaanni Politiit uppernarsarpaat.
- Inuusuttut akornanni sakkortuumik persuttaasarnerit amerliartortut nalaattalerpagut. Inuusuttut filmiliorlutillu videoliaminnik inoqatinut attaveqaatinik siammarterisarnerat takussaavoq. Tamatuma saniatigut perluuteqarfigineqartunut persuttaanerit aamma inerteqqutaasumik pillaassutaasinnaasumillu siammarterneqarnerat iluanngilaq, Kalaallit Nunaanni Politiit pinaveersaartitsinermut misissuinermullu pisortaat, Mikkel Høj Svendsen oqarpoq.
Tamannalu anaanasumut ernumanarsimaqaaq.
- Soorunami anaanatut ernumavunga aamma tupaallattorujussuugama assut, taamatullu kamaammernarluni neriunnaraluarami taamatut pisoqaqqissanngitsoq kisianni paasivara Nuummi ajoraluartumik nalinginnaasunngorsimasoq.
