Tusagassiorfik: Inuit marluk 14-nik ukiulimmut peqqarniitsumik saassussisimasutut pasineqartut
Nuummi inuit marluk nukappiaqqamut 14-inik ukiulimmut peqqarniitsumik saassisimasutut pasineqarput, saassussineq pivoq sapaatit akunnerata aallartinnerani.
Taama nalunaaruteqarpoq Kalaallit Nunaanni politiini tusagassiuuteqarnermut attaveqarnermullu suleqataasoq, Fabian Uht Nielsen
Taassuma oqaluttuaraa, politiit pisoq pillugu Nuummi innutaasunit paasissutissanik pissarsisimasut.
Saassussinermi videomik immiussamik politiit aamma pissarsisimapput.
AAMMA ATUARUK Nukappiaraq 14-inik ukiulik aqqusinermi ikinnerpaamik 15-eriarlugu isimminneqartoq
Nukappiaraq 14-nik ukiulik politiinut nassuiaateqarluni oqaluttuarpoq, Nuummi aqqusinermi Saqqarlernut ataasinngornermi unnukkut pisutsilluni inuusuttuaqqanit qulit missaanik amerlatigisunit ilisarisimanngisaminit uppitinneqarsimalluni
Tamatuma kingorna niaquatigut timaatigullu 15-eriarlugu isimmittarsimavaat. Kiinaatigut ajoqusernerit annertummata Nuummi napparsimmavissuarmi ajoqusersimasunut passusisarfimmukaanneqartariaqarsimavoq.
Pasineqartut tigusarineqarsimanngitsut politiit aviisimut Sermitsiaq.AG-mut oqarput.