Nukappiaraq 14-inik ukiulik aqqusinermi ikinnerpaamik 15-eriarlugu isimminneqartoq
Nukappiaraq 14-inik ukiulik Nuummi ippassaq unnukkut annertuumik saassunneqarpoq.
Taanna Saqqarlernumi nalunaaquttap 18-ip 22-llu akornanni ingerlatilluni timimigut, kiinnamigut niaqqumigullu ikinnerpaamik 15-eriarluni isimmittarneqarpoq.
Nukappiaraq inunnit ilisarisimanngisaminit ilisarisinnaanngisaminiilluunniit qulit missaanniittunit tassanngaannartumik uppitinneqarsimalluni politiinut paasissutissiissutigaa.
Nukappiaqqap saassussisut 15-it 17-illu akornanni ukioqassangatippai.
Nukappiaraq saassunneqareernermi kingornatigut ataataminut angerlarput, taassumalu saassussineq politiinut nalunaqutaq 23.36 nalunaarutigaa.
- Saassussinermut pissuteqarpasinngilaq. Pissutissaqanngitsumik nakuusernerorpasippoq. Nukappiaraq aamma tilliffigitissimanngilaq, Kalaallit Nunaanni Politiivini pigaartut pisortaat, Julie Senderovitz oqarpoq.
Nukappiaraq kiinnamigut ikeqarpoq ambulancenullu ilaatillugu napparsimmaviliaanneqarluni.
- Nukappiaqqap angutaa paasiniaaffigilaarlugu ullumi oqaloqatigilaarparput. Nukappiaraq unnuaq sinilluarsimasoq angutaata paasissutissiissutigaa. Napparsimmavimmit paasissutissanik maanna pissarsissaagut – nukappiararlu 15-it inorlugit ukioqarnera pissutigalugu taanna video atorlugu apersorneqassalluni, pigaartut pisortaat oqarpoq.
Politiit saassussisoqarneranut takunnissimasunik maanna ujartuipput. Nukappiaqqap saassussisut kavaajamik ”Arcteryx”-imik meqqilimmik atugarnerannik taakku 15-init 17-inut ukioqarnissaanik nassuiaanerata saniatigut allanik paasissutissaqanngilaq
Taamaammat pisiniarfinnit videomik nakkutilliissutit aqqusinermut sammisut maanna misissorneqassapput.
- Suliaq ilungersunartumik suliarivarput. Ilaatigut saassussinermi pissutissaqanngilluinnarpasinnera sakkortuneralu pissutigalugit. Suliaq pingaarnerutilluinnarparput, Julie Senderovitz oqarpoq.
Taassuma saassussinermik takunnissimasut tusagaqarsimasulluunniit tamarmik pigaartut oqarasuaataannut 701448-mut sianernissaat kaammattuutigaa.