Borgmesterip meeqqanik inuusuttunillu aqqusinermi unnukkut nakkutiginnittoqarnerulernissaa neriorsuutigigaa
Meeqqat meeqqanut allanut Nuummi aqqusinermi saassussisarunnaassapput.
Taamaammat meeqqanut inuusuttunullu siunnersortit amerlanerusut illoqarfiit pingaarnersaanni unnukkut angalaartinneqartassasut, Kommuneqarfik Sermersuup borgmesteria neriorsuivoq.
Tamanna Nuummi meeqqat meeraqatiminnut allanut saassussineri pillugit suliat piffissami kingullermi qassiiunerannik pissuteqarpoq.
Severine S. Jensenip ernera aqqaneq-marlunnik ukiulik aqqusinermi ammaannartumi sapaatip akunnerata siuliani saassunneqartut ilagaat. Taanna uppisinneqarluni nukappiaqqanit tallimanit persuttarneqarluni tukertarneqarput, meeqqallu allat qulit missaanniittut isiginnaartuullutik. Taannalu taama nalaataqartuni kisimiinngilaq.
AAMMA ATUARUK Doris J. Jensenip meeqqat persuttaasarnerat pillugu ataatsimiigiaqqusinera
Suliami allami nukappiaraq 14-inik ukiulik ikinnerpaamik 15-eriarluni timimigut, kiinnamigut niaqqumigullu februaarip ulluisa arfineq-pingajuanni tukertartippoq.
Taassuma inunnit qulit missaanniittunit ilisarisimanngisaminit ilisarisinnaanngisaminiilluunniit tassanngaannartumik uppisinneqarsimalluni politiinut paasissutissiissutigaa.
Taassuma saassussisut 15-it 17-illu akornanni ukioqassangatippai.
Meeqqat persuttaasarnerat pillugu sapaatip akunnerata siuliani ataatsimiittut
Siumumit politikerip, Doris J. Jakobsenip oqarnera naapertorlugu meeqqat meeqqanut allanut saassussinerannut suliat katillugit arfiniliupput – persuttaasoqaqattaarneralu politiit KNR-imut sapaatip akunnerata siuliani uppernarsarpaat.
Meeqqat Illersuisuata, Aviâja Egede Lyngep aamma uppernarsarpaa.
Tamanna unitsinneqartariaqartoq, Doris J. Jensen isumaqarpoq, taanna angajoqqaanut allanullu meeqqat persuttaasarnerannik unitsitserusuttunut sapaatip akunnerata siuliani ataatsimiinnissamik aaqqissuussivoq.
AAMMA ATUARUK Meeqqat illersuisuat: Meeqqanut persuttaasoqartarnera ernumanartumik takussaaleraluttuinnarpoq
- Piffissami sivikitsuinnarmi inuit minnerpaamik arfinillit saassutsipput, aammalu piffissaq kingulleq weekendtimi tusarparput savilersortoqarsimasoq, Doris J. Jakobsen oqarpoq, Kommuneqarfik Sermersoorlu oqaatsitigut patillugu:
- Oqartussaasut utaqqiinnarnatik akisussaaffimmik tiguseqataanissaat piffissanngorpoq.
Akuersaarneqarsinnaanngilluinnartoq
Borgmesterillu Charlotte Ludvigsenip (IA) inuit ernumassuteqarnerat paasisinnaalluarpaa.
- Soorunami ajornartorsiut una atuuttoq meeqqat inuusuttut meeraqatiminnut persuttaasarnerat kialluunniit akuerisinnaanngilaa, aamma tamanna atuuppoq kommunetsinni. Taamaattumik angajoqqaat ernumassutaat paasisinnaalluarpagut.
AAMMA ATUARUK Severinep ernera saassunneqartoq: Anaanatut ernumanarpoq kamaammernarlunilu
Kommunilli iliuuseqannginnerarneqarnera isumaqatiginngilaa.
- Utaqqiinartoqanngilaq, soorunami siusinaartumik qaqugukkulluunnit iliuuseqartarnissaq taanna pingaaruteqarpoq, ajornartorsiutip alliartulinnginnissaa pinaveersaartinniarlugu, borgmesteri oqarpoq.
- Akisussaaffeqarpugut, taamaammat aamma iliuuseqarpugut. Taamaammallu meeqqanut inuusuttunullu siunnersuisut amerlanerusut unnukkut nakkutiginnittassapput.