Unicef Maliina Abelsenip qimaleraa
Maliina Abelsen ukiuni kingullerni aqutsisooreerluni soraalermat, Unicef Danmarkip Kalaallit Nunaanni allaffia ulluinnarni aqutsisussamik ujarlilertussanngorpoq.
Taama Unicef tusagassiorfinnut nalunaaruteqarpoq.
Maliina Abelsenip programchefitut meeqqat pisinnaatitaaffiisa nunatsinnut paasisitsiniutigineqarnerat pingaarnertut isumagisarisimavaa.
- Maliinap suliarujussua qujassutigeqaarput, aamma Kalaallit Nunaanni meeqqat pisinnaatitaaffeqarnerisa tamanut siammarternissaa isumagilluarsimavaa.
- Paasisinnaaqaara siulersuisut arlallit ilaasortaaffini aallunnerorusulermagit aamma qujamasuutigeqaara ukiuni suliffigisamini suleqatigiilluarsimanera. Unicef-ip Kalaallit Nunaanni allaffeqalernerata ineriartortinnera allaffiup sunniuteqarluartup maanna piuneranik kinguneqarpoq, Susanne Dahl, Unicef Danmark generalsekretæriusoq tusagassiorfinnut nalunaarpoq.
Meeqqat toqqissisimasut qitiutillugit
Maliina Abelsen Unicef-ip oktobarip naaneraniit allaffianiikkunnaaraluarluni Unicefimi siunnersortitut suliinnassaaq.
Maliina Abelsen Nakuusamut (suliniutillu pilersaarutaareersut arlaqarput, aaqq.), Unicef Danmarkip naalakkersuisullu suleqatigiissutaanut akisussaasuusimavoq.
Meeqqat amerlanerusut ataatsimoorluni timiminnik aalatitsinerulernissaannut suliniummut aamma suleqataasimavoq. Tassani toqqissisimanerusumik avatangiiseqarneq pingaartinneqartuuvoq. ’Ataatsimoorluta Aalasa’-mi Kalaallit Nunaanni Timersoqatigiit Kattuffiat suleqatigineqarpoq.
- Unicef-ip allaffiani meeqqanut pisinnaatitaaffiit qitiutillugit sulineq immikkut misigisaavoq, Maliina Abelsen oqarpoq.
Meeqqat toqqissisimanissaat maani nunatsinni pingaaruteqarluinnartuuvoq, meerartavut toqqissisimappata inuiaqatigiit patajaatsumik inooriaasillit atuuttuarsinnaassammata. Allaffik inuiaqatigiinnut ullumimut sunniuteqarluartuummat toqqissisimallunga taamaammat qimalerpara, Maliina Abelsen oqarpoq.
Unicef taartissaanik ujarlilerpoq. Unicefimi suliniutinik aqutsisuusoq Aviaaja Barlach Pregaard allaffimmi 1. novembarimiit pisortaagallassaaq.
