Mittarfimmi nuannataarneq: Unammisartut Stavangerimut tikittut

Kalaallit erfalasut erfalatinneqarpoq, tujuuluaqqallu aappaluttut atorneqarlutik.

Stavangerimi mittarfik ilaquttanit, ikinngutinit nuannaartorinnittunillu aappalutsinneqarlunilu qaqortinneqarpoq. Kalaallimmi assammik arsarnermi nunanut allanut unammisartui nunarsuarmi pissartanngorniuttunut peqataajartorlutik Stavangerimut marlunngornermi ualikkut tikipput.

Unammisartullu tikittarfimmut appakaakkamik nuannaartorinnittorpassuarnik naapitaqarnerat misigissutsinik qaffakaatitsivoq:

- Nuannerpoq. Taama amerlatigisut takkunnerat killitsinnaqaaq, Aviaaja Heilmann oqarpoq, taassumalu qatanngutaa qullipittoq sanianiippoq:

Killitsingaatsiarputit?

- Ikinnguterput ukiuni 100-ni takusimanngisarput takuara, Anja Heilmann oqarpoq.

Takorloorneqarsinnaanngitsoq

Nunanut allanut unammisartut tikilluaqqulluaqquneqarnissartik naatsorsuutigereersimagaluaraat taama amerlatigisut takkunnerat tupaallaatigaat.

- Taama amerlatigisut takkunnissaat naatsorsuutiginngikkaluarparput. Qanoq isikkoqarnissaa imaluunniit inuit qanoq amerlatigisut takkunnissaat takorloorneqarsinnaanngilaq, Aviaaja Heilmann oqarpoq.

Pitsaanerusumik aallartittoqarsinnaava?

- Naamik nuanneqaaq. Najuunnerat qujamasunnaqaaq, qatanngutigiit ataatsikkut oqarput.

Unammisartut Stavangerimut tikinnginnerminni Ikastimi sapaatip akunnerata missaa sungiusaqqaarput.

- Unamminissamut siullermut sungiusarnigut pitsaapput.

Taava piareerluinnarpusi?

- Aap, piareersimavugut. Holdiulluarpugut, ataqatigiilluarlutalu, qatanngutigiit oqarput.