AWG: Unammillerneqarluarluni Lars Jeremiassenip rekordi anguaa

Issittormiut unammiuaarneranni Arctic Winter Gamesimi timersuutini arlariinni kalaallit unammeqqikkamik ingerlalluarput ujammillu kultinik pingasunik ilallugit.

Arctic sportsimi unammeriaaseq Alaskan high kick soorlu taaguutaata ilimanarsisikkaa Alaskamiut siuttuuffigisarpaat. Tassani unammeqataasut timertik tamaat tallimik ataatsimik kivittarpaat aqulluakkamillu tuttussaallutik.

Ukiormannali angutini inuusuttuaqqani tamanna ukioq manna allanngortinneqarpoq. Lars Jeremiassen ajugaasuuvoq Arctic Winter Gamesimilu rekordi 2 meter 24 centimeter angullugu.

- Qangali Arctic Winter Gamesimi kulti angoruttarnikuullugu kiisami anguara. Assorujussuaq nuannerpoq, Lars Jeremiassen KNR-mut oqarpoq.

Aajuna allamiu Alaskan high kickimi periartoq Assi © : AWG 2024 - Mary Webb Photo

Alaskameersut marluk assut unammilleraluarput portussutsit ikittuinnaat peqataaffigisinnaasaat nallerneqarmata.

- Assorujuk pissangavunga tassunga killinnermi. Pingaartumik Alaskamiut marluk kisiisa kiserngoruteqatigigakkit, oqarpoq.

Unammeriaatsimi one foot high kickimi Randi Zeeb Sigurdsen kultinnappoq 218 centimeterimik portussusilimmiittoq isimmikkamiuk.

Angusaq qaqutigoortoq

Arctic Sportsimi pakassummittoqarmat oqaluttuarisaanermut attuumassuteqartumik aamma pisoqarpoq.

Tassami angutit inuusuttuaqqat kulti, sølvi bronzelu pissarsiaraat. Kalaallit ataasiaannarlutik tamanna angunikuuaat 1996-mi Alaskami Arctic Winter Gamesertoqarmat.

Akuttoqatigiissumik ersaartaattoqarpoq puisaasaanermi knuckle hopimi assak peqillugu tassannga isikkallu nuuinik taamaallaat tuttarluni ingerlavimmut takineqqusaattoqarmat.

Inuuteq Josefsen Nunatsinneersoq sølvinnappoq 41,1 meter ingerlaffigereerlugu.

Hand gamesimi kalaallit angutit inuusuttuaqqat kultinnapput. Tassani iligiinni sisamanik inuttaqartuni qisuara sorliup tigummineraa eqqoriaqattaarneqartarpoq. Paatsiveerussaariniarlutik timitik aallatillugillu kiinnatik iloqilliortittarpaat Assi © : AWG 2024 - Berdell Akootchook

Dene Gamesimi kalaallit aamma ujaminnapput hand games unammissutigineqarmat. Qisuaqqat toqqortarlugit kia tigumminerai eqqoriaqattaarneqartarpoq eqqillit qilaataannik unammineq tamaat qilaatersortoqartoq.

Tassani angutit inuusuttuaqqat kultinnapput angutit inersimasut bronzennattut.

Ullut unammiffiit kalaallit peqataaffigisaanni marluinnanngorput arfininngorpallu naggataarnersiortoqassalluni.