AWG-mi oqaluttuarisaanermut ilannguttumik ujaminnattoq: Annertuallaangajapporluunniit
Arctic Winter Gamesimi oqaluttuarisaanermut Nunatsinniit ilannguttut ippassaq ataasinngornermi marluupput.
Eqqillit pinnguaataanni Dene Gamesimi unammisartoq Aaka Tobiassen Qaarsuneersut kalaallini arnani inersimasuni siullersaalluni ujaminnappoq eqitariaatsimi stickpullimi bronzennakkami.
Eqitaq taanna qaqorsaammik pujassariarlugu eqitarneqartarpoq.
- Unamminitsinni tusarusunnikuunngilara sumut killinnerlunga unamminissara kisiat eqqarsaatiginiarlugu, Aaka Tobiassen KNR-mut oqarpoq.
Finale angungajakkaluarpaa semifinalemili iluatsitsinerliulaarluni.
- Angusara nuannaarutigisorujussuuara annertuallaangajapporluunniit, ujaminnattoq maniguulluni oqarpoq.
Angutini inersimasuni stickpullimi siorna pissartanngortoq Minik Møller Platou ajugaaqqippoq angutini inuusuttuaqqani unammeqataasoq Aqqalu Lukassen bronzennattoq. Arnani inuusuttuaqqani Majka Qvist sølvinnappoq.
AWG-mi rekordiliisoq
Randi Zeeb Sigurdsen Arctic Sportsimi, siorna Arctic Winter Gamesimi ilisimaneqarlualersoq, ukioq manna aamma aallartilluarpoq – annertuseriaannarlugulu.
Tassami unammeriaatsimi two foot high kickimi Arctic Winter Gamesimi rekordi qaangerlugu rekordiliivoq 190,5 centimeterimik portussusilimmiittoq isimmikkamiuk rekordiusoq centimeterinik marlunnik qaangerlugu. Tassani unammeriatsimi eqqoriagaq isikkanik marlunnik isimmeriarlugu aqulluakkamik tuttussaapput.
Unammeriaatsimi angutit inuusuttuaqqat aamma ingerlalluarput Inutsiaq Rosing kultinnammat Lars Jeremiassen sølvinnattoq.
Suli ujammit ilaneqarput.
Niaqqumik noqqoruunnermi headpullimi Inuuteq Josefsen kultinnappoq Andreas Johansen bronzennattoq. Pingasoriarluni pissigarnermi trible jumpimi Inuuteq Josefsen bronzennappoq tassanilu inuusuttuaqqani Lars Jeremiassen sølvinnalluni.
