Umimmanniapiluttoqartarneranut allannguisoqassamaarpoq

Piniartut amerlanngitsut piniapiluttarnerat piniartunit allanit isorineqartarpoq, ataasiakkaallu umimmappassuarnik pisaqartarnerat, Naalakkersuisoqarfimmi umimmaat pillugit ingerlatsinermi suliaqartup, Nuka Møller Lundip ilisimallugu oqaarpoq.

- Suu nalunngilara taamaattoqartoq, piniapilunnermik taaneqarsinnaagaluartoq kisianni maleruagassat maannakkutut itsillugit iliuuseqarfiginissaa imaluunniit killilersuiffiginissaa ajornalaarpoq.

Januarimi februarillu aallartinnerani piniapilunnerit aallartittartut Nuka Møller Lundip ilanngullugu oqaatigaa. 

Aamma atuaruk Piniartut ataasiakkaat umimmanik amerlasuunik pisaqartarput

Umimmaat qanoq amerlatiginerinik Pinngortitaleriffik ukiuni kingullerni kisitsinikuunngilaq, taamaattumik umimmaat amerlassusaat eqqoriarneqaannaarsinnaavoq. 

Taamaammat allannguisoqarnissaa eqqarsaatigileqalersoq Nuka Møller Lund oqarpoq.

- Allannguinissamut maannamut eqqarsaateqarpugut, kisianni soorlu aamma tusarniaassutigineqartuni nalunaarutigineqartoq sukaterinissaq ukiuni aggersuni piumaartoq.

Tassanerpiaq aamma pissutaatinneqarpoq biologit ukiuni kingullerni kisitsisarneri pisarsimanngimmata, piniarnermut naalakkersuisoqarfimmi, umimmaat pillugit ingerlatsinermi suliaqartoq, Nuka Møller Lund oqarpoq.

Inuussutissarsiutigalugu piniartunut umimmattassaat killilerneqarnissaat piniartut ilaasa nakkutilliisullu ukiuni kingullerni siunnersuutigineqartalersimavoq.

- Siunnersuutigineqarnikuuvoq ukiuni kingullerni. Ilaatigut tusarniaanerni allatigullu tusartarnikuuarput siunnersuutigineqartoq piniartumut ataatsip pisarisinnaasai killilerneqassasut, Nuka Møller Lund oqarpoq. 

Licencit aaliangersimapput

Qeqqata Kommunianiit Sisimiuni aqutsiveqarfimmi, aalisarnermut piniarnermullu siunnersuisup, Otto Berthelsenip oqaluttuaraa, Kangerlussuup avannaa tungaani Sisimiuni aqutsiveqarfimmeersut umimmanniarsinnaapput, tassanilu umimmaat 300-t ukioq manna pisassiissutigineqarput. Piniartullu licencimik pereersut peqqissinnaanngitsut erseqqissaatigaa.

Maniitsumi aqutsiveqarfimmeersut Kangerlussuup kujataa umimmanniarfigisarpaat, ukioq mannalu killeqanngitsumik umimmattassiisoqarpoq. Tassani piniartut licencimik nutaamik qinnuteqarsinnaapput.

Aamma atuaruk Kangerlussuarmi umimmanniarneq inerteqqutaalersinnaavoq