Kangerlussuarmi umimmanniarneq inerteqqutaalersinnaavoq
Qamutinik motoorilinnik, ATV-nik Kangerlussuup eqqaata piniarfianni unioqqutitsilluni angalaneq pissutigalugu, Kangerlussuup eqqaani umimmaat takussaajunnaangajassimapput.
Kangerlussuarmi eqqaanilu umimmaat amerlisinniarlugit umimmanniarneq inerteqqutaalersinnaasoq, Qeqqata Kommunianit oqaatigineqarpoq.
- Kangerlussuup qinngorpiaani piniarneq inerteqqutaalluinnalersinnaavoq. Arlaannik soorunami periarfissat aamma assigiinngitsuusinnaapput, kisianni taanna aamma periarfissaavoq, Qeqqata Kommuniata teknikkimut avatangiisinullu ataatsimiititaliaani siulittaasoq, Karl Lyberth taama oqarpoq.
Aamma atuaruk Takornariat ATV-nik pakatsisinneqartarput
Qamutit motoorilinnik, ATV-inik angalaneq piffiit ilaanni inerteqqutaavoq, piniarfinnilu unioqqutitsilluni angalaneq ajornartorsiortitsivoq.
Qamutit aqqutaat nunami takuneqarsinnaalluarput, motoorillu nipitunerat pissutigalugu umimmaat Kangerlussuarminngaanniit ungasilliartorput.
- Maannakkut paasinarpoq, Kangerlussuup qinngorpiaani umimmanniartarneq pingaartumik ajornartorsiutitut isikkoqaleriartorpoq. Assortorneqarsinnaannginnami Kangerlussuup qinnguata qanittuani umimmaat ungavarsimasut aamma takussaarpiarunnaarsimasut, Karl Lyberth taama oqarpoq.
Takornarianik sullissaqartut umimmassaaruttut
Kangerlussuup eqqaani umimmaat ikilisimasut, takornarianik ingerlassisartunit marlunnit sapaatip akunnerata siuliani oqaatigineqarpoq.
Takornarianullu tamanna pakatsisitsisarsimavoq, umimmaallu nassaariuminaanneri pissutigalugu World of Greenland Arctic Circle umimmannik takuniaatitsisarunnaarsimavoq.
Qamutit motoorillit umimmannik qimaatitsisartoq piniarnermut nakkutilliisup aamma ilisimallugu, KNR-imut sapaatip akunnerata siuliani oqaatigaa.
Umimmaallu amerleqqinnissaat Qeqqata Kommuniani kissaatigineqarpoq, umimmanniarnerullu inerteqqutinngornissaa piareersimaffigineqarluni.
Namminersorlutik Oqartussat akisussaaffik tigummivaat
Qeqqata Kommuniani politiit ajornartorsiutimut aamma ilisimannilluartut, Qeqqata Kommuniani politiit ittuat Johan Davidsen oqarpoq.
Qamutilli motoorillit pillugit suliat piniarnermut nakkutilliisup suliassarigai, taamaammallu Namminersorlutik Oqartussat akisussaaffigigaat, Davidsen oqarpoq.
Taamaakkaluartoq Johan Davidsen innuttaasunut kaammattuutissaqarpoq.
- Inuit, piniarnermut nakkutilliisutuulli, ATV-nik, snescooterinilluunniit unioqqutitsillutik atuisunik takusaqarunik politiinut nalunaarsinnaatitaapput. Taava taanna aallaavigalugu politiinit suliassatut tigussavarput, Johan Davidsen taama oqarpoq.
