Takornariat ATV-nik pakatsisinneqartarput
Pinngortitarsuarli qamutinik motoorilinnik nutaalianik angallavigineqalermat, nuna ingerlavikunik ulikkaartoq, umimmaallu aamma ilorparternerulermata takornariaqarnermut kingunerlutsitsisoq, takornarianik angallassisartut maluginiarpaat.
Takornariallu taamaanneranut pakatsissartut, Jens-Pavia Brandt oqarpoq.
Kangerlussuarmi takornarianik angallassisartup, Jens Pavia Brandtip, Kangerlussuarmi takornariaqqaarneranit ukiut qulit qaangiupput, taamanilu umimmaat takunissaat ajornanngitsuaraasimavoq.
Aamma atuaruk Kommuni nammineerluni ATV-nut aqqusiussasoq
- Kangerlussuup avannaatungaani qanga pisukkaangama umimmannik ullormut quliniit 40-it tikillugit takusarpunga. Maanna ullorpassuarni pisutsinnanga umimmammik takuffiunngilaq, takornariartitsivimmik Greenland Outdoorsimik piginnittoq, Jens-Pavia Brandt, oqarpoq.
Kangerlussuup eqqaani umimmaqannginera takornarianut angallassinissamut neqeroornissaq taamatullu misigisaqarluartitsinissaq ajornarnerusoq Jens-Pavia oqarpoq.
- Tamaammat soorunami umimmaqarluarneratulli takusassanik neqeroorutissaqartiginngilagut, Jens-Pavia oqarpoq.
WOGAC allannguisariaqarsimavoq
Tammajuitsussarsiffissaminnik umimmanniarlutik takornarianik angallassisarnerit takornarialerisup aappaata, World of Greenland Arctic Circlep taamaativissimallugu oqarpoq.
- Umimmannit tammajuitsussarsiniartitsissaarnikuuvugut. Maanna narsaamanersualiartitsinernik taagukkatsinnik neqerooruteqarpugut, taakkunalu umimmannik siumuinissaq neriosuutigisinnaanngilluinnarparput, World of Greenland Arctic Circlemi pisortaasoq, Jørgen Larsen oqarpoq.
Takornariallu umimmannik takunninngitsoortut pakatsisartut, taassuma isertuutinngilaa
- Takornarianut pilerinarsaataasumik Kangerlussuaq umimmaqartuaannarnikuugaluarmat, eqqaata umimmaarunnera pakatsinarluinnarpoq. Aammalumi takornariat nunani allaneersut Kangerlussuarmi umimmaqarnera tusartarmassuk, pakatsinersuaqartarpoq, Jørgen Larsen oqarpoq.
ATV-it nunami ingerlavikui
Umimmakillineranik pakatsisarnerup saniatigut qamutit motoorillit ingerlaviisa takussaanerujussuat takornarianit pakatsissutigineqartartoq, takornarianik angallassisartoq Jens-Pavia Brandt oqarpoq.
- Qaqqani pisunnitsinni qamutit motoorillit sisamanik assakaasullit ingerlavigisimasaasa nunami sumi tamaani takussaanerat ajornartorsiutit annersaraat. Takornariat taamaalillutik eqqarsalertarput, nuna ingerlavikunik ulikkaarami minguitsuunanilu nuannersuunngitsoq, takornariartivimmi Greenland Outdoorsimi piginnittoq, Jens-Pavia Brandt oqarpoq.
