Assi: Kim Sungwon

Kommuni nammineerluni ATV-nut aqqusiussasoq

Aqqusiniliornissaq akisuallaassaqaaq, Sisimiulli Kangerlussuullu akornanni ATV-nut aqqusiorneq aappaagu piviusunngortinneqarsinnaavoq. Naalakkersuisulli tamatumunnga ikioqataajumanngillat.

Qamutinut motoorilinnut sisamanik assakaasulinnut, ATV-nut, Sisimiut Kangerlussuullu akornanni aqqusiornikkut Qeqqata Kommuniani Destination Arctic Circlemi takornariartitsineq siuarsarneqassaaq.

Tamatumunngali Naalakkersuisunit ikiorsiissutissaqanngilaq, kommunimmi aqqusiornissamik pilersaarutaa Naalakkersuisut  maannakkorpiaq tapersersornianngilaat.

IA-meersup Peter Olsenip, paragraf 37 atorlugu apeqquteqaataanut attaveqatigiinnermut naalakkersuisup, Knud Kristiansenip, akissutaani tamanna erserpoq.

 

Aqqusiniliassaq akisuallaassaaq

Takornariat ukiukkut Sisimiut Kangerlussuullu akornanni qamuteralannik angalasinnaanissaat aasaaneranilu aqqusineqanngitsukkut ingerlasinnaasunik ATV-nik angalasinnaanissaat siunertarineqarpoq. 

Aamma atuaruk Qeqqata Kommunia Kangerlussuarmi nutaamik umiarsualiviliorusuttoq

Siunertaagaluarpoq biilinik aqqusinikkut akunnermut kilometerinik 60-inik sukkatigisumik ingerlasoqartassasoq, kommunilli nammineerluni missiliuinera naapertorlugu illoqarfiit taakku marluk akornanni aqqusinermik marlunnik ingerlavissalimmik sanaartornissaq 300-400 millionit koruuninik akeqassaaq. Taamaammat ATV-nut aqqusiornissaq 12 millionit koruuninik akeqassangatinneqartoq periarfissaasinnaavoq, kommuni taama naliliivoq.

 

Periarfissarpassuarnik nassataqassangatikkaat
Kommunip ilaatigut aalisakkanik nutaanik assartuiffiusussamik aqquserngiornissamik anguniagaa taamaasilluni ungasinnerusutut-ippoq.

Kommuni ukiormanna avatangiisitigut nalilersuineq aallartissavaa aqquserngiorneq aappaagu aallartinniarlugu.

ATV-nut aqqusiorneq pingaaruteqarluassasoq kommunalbestyrelsip qularutiginngilaa. 

- Taamatut aqqusiorneq takornariartitsinermut annertuupilussuarmik periarfissiissaaq, peqatigitillugulu aamma allanut takutinneqassalluni Sisimiut Kangerlussuullu akornanni aqquserngiornissaq pisariitsuusoq, kommunalbestyrelsip ukiormanna februaarip 26-ani ataatsimiinneranit imaqarniliami taama allassimavoq.

 

Inatsisinik unioqqutitsillu angallattoqartoq

ATV-it atorlugit inatsisit unioqqutillugit angallanneq maanna ajornartorsiutaaqaaq, taamaaliornikkut pinngortitaq ajoquserneqarmat. Taamaaliorneq unitsinniarlugu taavalu aamma angallanneq isumannaaanneruleqqullugu, Qeqqata Kommunia isumaqarpoq, ATV-t tamarmik sumiinnermik nalunaarsuusersorneqarnissaannik inatsisiliornissaq pisariaqartoq.

Aamma atuaruk Kangerlussuarmi umimmanniarnermut atatillugu ATV-nik unioqqutitsilluni atuineq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat