Piniartut ataasiakkaat umimmanik amerlasuunik pisaqartarput
- Nalunngilarput inunnit ilaannit 3-400-nik umimmattoqartartoq, tunitsivissarsiorliornermik allaat kinguneqartalerluni, piniarnermut nakkutilliisoq Sisimiuneersoq, Hans Mølgaard oqarpoq.
Akuersissummi ataatsimi umimmaat 25-it missaanni pisarineqarsinnaatitaasut, taakkuli pisarineqareerpata, akuersissummik nutaamik qinnuteqartoqarsinnaasoq, taamaasillunilu inuup ataatsip 400-it tungaanut pisaqarsinnaasoq, Hans Mølgaard nassuiaavoq.
Iliuuseqartoqartariaqarpoq
Umimmanniarnissarlu sapernannginnerulersimasoq, tammajuitsussarsiniarluni piniartitsisartumi, Inuit Outfittingimi, ingerlatseqataasoq, Malene Ingemann oqarpoq.
Tassami qamutit motoorillit umimmanniarnermut atorneqartalernerata kingorna piniartut ungasissumut angalasinnaalernikuugamik.
Kangerlussuarmilu umimmaat takussaavallaarunnaarneri piniarpallaarnermik pissuteqartoq, umimmaallu amerliqqissappata iliuuseqartoqartariaqartoq, Malene Ingemann isumaqarpoq.
- Umimmanniartartut amerlarujussuanngikkaluarput. Inuilli ataasiakkaat umimmapparujussuarnik pisaqartarput. Tamannalu allanngortinniarneqavippat inuit ataasiakkaat umimmannik pisaqarsinnaanerat killilerneqassasoq isumaqarpunga, immaqalu inunnut ataasiakkaanut umimmannut pisassiisoqartalerluni, Malene Ingemann oqarpoq.
Piniartut aamma nuannarinngilaat
Inuit ataasiakkaat umimmappassuarnik pisaqartarnerat piniartuninngaanniit aamma nuannarineqanngilaq.
Piniartut Kangaamiuninngaanneersut aasat tamaasa Kangerlussuarmut umimmanniariartarput.
Qamutillu motoorillit atugaalernerata kingorna piniartut umimmanniartarfiugaluagaanni umimmaat takussaavallaarunnaarsimasut, taamaammallu inuit ataasiakkaat iliuusaannit piniartut aamma eqqorneqartut, Kangaamiuni aalisartut piniartullu peqatigiiffianni siulittaasoq, Efraim Olsen oqarpoq.
- Taanna ilumoorpoq. Inuit ikittunnguit taamarujussuaq pisaqartarneri soorunami naluneqanngilaq. Aamma taakku politikerinut anngunneqareernikuupput, Efraim Olsen oqarpoq.
