Umiatsiaararsortoq politikerinut naveersivoq: Kinguaariit tullissaat eqqarsaatigisigit
Sinerissap qanittuani qaleralinniarluni aalisarneq annertuallaamik ingerlanneqarpoq. Allaat ima annertutigisumik ingerlanneqarpoq aalisarnermut ataatsimiititaliarsuup sinerissap qanittuani qaleralinniarnerup ajalusoorsinnaanera aarleqqutigalugu. Ajalusuussangaluarpallu aalisarnermik inuussutissarsiuteqarfinnut, illoqarfinnut aamma inuiaqatigiinnut tamanut, ilaatigut najugaqariaatsimut, tuniluuttumik kinguneqarsinnaasoq aarleqqutigineqarpoq.
Ataatsimiititaliarsuarli kisimi taama aarleqquteqanngilaq.
Ilulissat nunaqarfiani Ilimanameersoq, aalisartoq Fritz Johansen, ukiuni 41-ni umiatsiaararsorluni aalisartuusoq, aalisarnermut ataatsimiititaliarsuup Ilulissani innuttaasunik ataatsimiititsinerani politikerinut naveersivoq.
Fritz Johansenimi isumaqarpoq politikerit innuttaasut akornanni qineqqusaarneranni umiatsiaararsorlutik aalisartut eqqorneqartut.
AAMMA ATUARUK Ataatsimiititaliarsuup siulittaasuata iluliarmiut aalisartut naapinnissai qilanaarai
- Akuersissutit amerliartortinneqarlutik umiatsiaararsortut amerlipiloortinneqarpugut. Taamaalilluta politikkikkut eqqungaavugut. Taamaalillunilu umiatsiaararsortuuneq aarlerinartumut inissilluni, Fritz Johansen taama oqarpoq.
Umiatsiaararsorluni aalisartunut akuersissutit:
- 2019: 1849
- 2010: 1043
Qeqertarsuup Tunuani qaleralittassiissutit:
2019:
- Qeqertarsuup Tunua: 8180 tons
- Siunnersuutigineqartut: 5120 tons
- Immikkut pisassiissutigineqartut: 2900 tons
Umiatsiaararsorlunimi qaleralinniarnermut akuersissutit ukiuni kingullerni qulingiluani amerleriarujussuarsimapput. Tassa 2010-imi 1043-it akuersissutaateqarsimasut siorna 2019-imi 1849-it akuersissutaateqalersimammata. Akuersissutaatillillu amerleriaraluartut ataatsimiititaliarsuaq naapertorlugu akuersissutaatilinni 27 procentii kisimik qaleralinnik tulaassaqarnerminni 2018-imi agguaqatigiisillugu ukiumut isertitarineqartoq, tassalu 245.000 koruunit, angusimavaat.
- Erliguussinianngilanga aalisakkat tungaatigut. Inuiaqatigiit tamatta pigigatsigit. Kisianni siunissarput kinguaassagullu pillugit aaqqiisoqartariaqarpoq. Tassami takusarparput imaluunniit tusartarparput aatsitassarsiorfissuit nunguutsigaangamik qimaguttut imaluunniit illoqarfissuit inueruttut. Taamaalisoqassanngippat aaqqiisoqartariaqalerpoq, Fritz Johansen oqarpoq.
Taamaammat Fritz Johansen isumaqarpoq politikerit aalisarnermi pisuussutinut aqutsinerminni sukaterisariaqartut, ilaatigut soorlu umiatsiaararsorlutik aalisartut ataasiakkaatut pisassinneqartalernerisigut.
AAMMA ATUARUK Aalisarneq pillugu Ataatsimiititaliarsuaq Ilulissani innuttaasunik ataatsimiititsilerpoq
Taamaammat Fritz Johansen isumaqarpoq politikerit aalisarnermi pisuussutinut aqutsinerminni sukaterisariaqartut, ilaatigut soorlu umiatsiaararsorlutik aalisartut ataasiakkaatut pisassinneqartalernerisigut.
- Aalisakkat assigiinngitsut aamma ujartortinneqartariaqarput. Soorlu assersuutigalugu nipisanniarneq piffissap ilaani ingerlanneqartillugu. Ilaannilu saarulliit aamma qalerallit. Aamma allarpassuaqarpoq, soorlu qeeqqat. Inuuniutaasinnaapput pimoorukkaanni. Qaleralimmi kisimi aalisagaanngilaq, Fritz Johansen oqarpoq.
Aalisarnermut ataatsimiititaliarsuup suliani pillugit isumaliutersuutini ukioq manna juuni naatinnagu tunniutissavaa. Kisianni ataatsimiititaliarsuaq piffissamik sivisunerusumik pisariaqartitsippat, tamanna kinguartinneqarsinnaavoq.
- Maanna suli oqaatigisinnaanngilara. Suli neriuutigaarput piffissaq eqqorsinnaassallutigu, kisianni kinguartitsiniarnerluta suli aalajangiutinngilarput. Taamaattorli takusinnaavara juunip tungaanut angumeriniarnissaa ajornakusoorsinnaassasoq. Kisianni angumeriniarsaralugu maanna ulapippugut, Jens Paulsen, ataatsimiititaliarsuup siulittaasua oqarpoq.
