Ataatsimiititaliarsuup siulittaasuata iluliarmiut aalisartut naapinnissai qilanaarai
Qeqertarsuup Tunuani aalisarneq qitiutillugu oqallinneq.
Tamanna pissaaq Aalisarnermut ataatsimiititaliarsuaq Ilulissani innuttaasunut aalisartunullu aqagu marlunngornermi ataatsimiititsilerpat.
Innuttaasunillu ataatsimiititsinissami qulequttanik eqqartugassarpassuaqarpoq. 2019-imiinnarmi eqqarsaatigalugu Qeqertarsuup Tunuani qaleralittassat 2900 tonsinik ilaneqarput, taamaalillutik biologinit innersuussutigineqartut marloriaataa sinnerlugu amerlanerulerlutik.
Ilulissani nunaqarfiinilu 2019-imi tunisat nalingi
- Qalerallit: 191 mio. koruunit
- Raajat: 145 mio. koruunit
- Saarulliit: 6,5 mio. koruunit
- Tassa qaleralinniarneq ullumikkut annertuallaamik ingerlanneqarpoq. Taamaammat ernummatigivarput qaleralinniarnerup ajalusooratarsinnaanera. Ajalusooraluarpallu aalisartumut, ilaqutaanut, tunisassiorfinnut sulisuinillu kingunerlussinnaavoq. Immaqalu aamma najugaqariaatsimut naggataatigut kingunerlussinnaalluni, Jens Paulsen aalisarnermut ataatsimiititaliarsuarmi siulittaasoq taama oqarpoq.
Kisianni umiatsiaararsortunut nammineq pisassaqartitsilluni aalisarsinnaaneq, tassa pisassiissutit inuttut ataasiakkaatut sivisuumik pigineqarlutillu niuerutigineqarsinnaasut, innuttaasunik ataatsimiititsinermi pingaarnertut qulequtarineqarsinnaanerat ataatsimiititaliarsuup siulittaasuata ilimagaa.
- Qulequtarmi taanna Ilulissani Aalisartut Piniartullu Peqatigiiffiata aamma peqatigiiffiit allat ataatsimiititsinermut takkuttussat soqutigisarivaat, Jens Paulsen oqarpoq, nangillunilu:
AAMMA ATUARUK Aalisarneq pillugu Ataatsimiititaliarsuaq Ilulissani innuttaasunik ataatsimiititsilerpoq
- Aamma isertugaataanngilaq qaleralinniarsinnaanermut akuersissutit tunniussorneqarnerat unamminartinneqartoq, taamatullu amerlasuut ataasiakkaanut pisassiisoqartalernissaa kissaatigigaat, Jens Paulsen oqarpoq.
Qeqertarsuup Tunuani qaleralittassiissutit:
2020:
- Qeqertarsuup Tunua: 8180 tonsit
- Innersuussutigineqartut: 5120 tonsit
2019:
- Qeqertarsuup Tunua: 8180 tonsit
- Innersuussutigineqartut: 5120 tonsit
- Immikkut pisassiissutigineqartut: 2900 tonsit
Qaleralik ukiuni makkunani akigissaartinneqarpoq, Ilulissanimi nunarfiinilu siorna 191 millioner koruuninut tunisisoqarsimavoq. Kisianni aalisarnermut ataatsimiititaliarsuup siulittaasuata qaleralinniarnerup ajalusoorsinnaanera ernummatigivaa.
- Piffissami matumani qalerallit naammaginartumik akigissaarput - aamma qalerallit mikinerit. Kisianni qalerallit mikivallaalerpata ernummatigineqarsinnaavoq qalerallip tunineqarsinnaajunnaarsinnaanera. Tamannalu uanga ajalusoornertut taasinnaavara, tassami aalisartoqaqqilersinnaaneranut ukiut arlallit utaqqisoqartariaqassammat, Jens Paulsen oqarpoq.
Taamaammat taassuma Ilulissani innuttaasunik ataatsimiititsisoqalerpat umiatsiaararsorlutik aalisartunut ataasiakkaanut pisassiisoqartalernissaa aamma aalisarsinnaanermut akuersissutit tunniunneqartartut amerlassusaat qitiutillugit oqalittoqarumaartoq naatsorsuutigaa.
- Minnerpaamik aalisartut tamarmik immikkut pisassaqartalernissaat, taamaalilluni pisassiissutigineqartunut paggalluni aalisartarneq atorunnaassangaluarmat, Jens Paulsen aalisartunik iluliarmiunik naapitsinissaminut qilanaartoq taama oqarpoq.
Ilulissani innuttaasunik ataasimiititsineq kulturikkut illorsuarmi Sermermiuni aqagu marlunngornermi nalunaaqutaq 19.00-imit ingerlanneqasaaq.
