Umiatsiaararsortoq: Bankip killiliinera siusinaarluni iliuuseqarneruvoq

GrønlandsBankenip umiatsiaararsortunut aningaasanik atukkiisarunnaarnera ajalusoortoqannginnerani siusinaarluni iliuuseqarneruvoq. Taama iluliarmiu umiatsiaararsortoq isumaqarpoq.
Qeqertarsuup Tunuanut immikkut qaleralittassiissutit ilanngullugit ukioq manna pisassiissutigineqartut 10.580 tonsiupput. Taakkunannga umiatsiaararsortunut 5.173 tonsit
Allattoq Kathrine Kruse
oktobarip 22-at 2019 06:52

Ilulissani umiatsiaararsorlutik aalisartut ilaannit GrønlandsBankenip umiatsiaararsortunut aningaasanik atukkiisarunnaarluni nalunaaruteqarnera tupaallaatigineqanngilaq.

- Tupaallanngilanga. Massakkut aalisapilunneq ingerlanneqartutut oqaatigisariaqarpoq, umiatsiaararsorluni aalisartoq Arne Hansen oqarpoq.

Taanna Ilulissani Aalisartut Piniartullu Peqatigiiffiata siulittaasuanit taperserneqarpoq.

- Aalisartut - pioreersut - illersorniarlugit isumaqarpunga pitsaasumik taanna iliornerusoq. Killeqanngitsumik suna tamarmi ingerlasinnaanngilaq. Aamma killeqartariaqarpoq inuussutissarsiorneq ingerlassappat, Johan Villadsen Ilulissani Aalisartut Piniartullu Peqatigiiffianni siulittaasoq oqarpoq.

AAMMA ATUARUK Grønlandsbanken umiatsiaraasortunut aningaasaliisarunnaartoq

Qeqertarsuup Tunuanut qalittassiissutitut 8.180 tonsit ukioq mannamut pisassiissutaapput. Taakkunani 3.800 tonsit umiatsiaararsortunut pisassiissutaallutik.

Kisianni umiatsiaararsortut pisassaat septembari aallartilaartoq nungummata umiatsiaararsortut qalitassat 1.373 tonsinik ilaneqaqqipput.

- Amerlasoorujussuit aalisaramik. Kikkut tamarmik aalisarniarsaripput. Taamatut oqaannaraanni, Arne Hansen oqarpoq.

Taakkuami naapertorlugit umiatsiaararsorlutik aalisarsinnaanermut akuersissutinik tunineqartut ukioq manna amerleriarsimapput.

- Pissutigalugu qaleralik akisunermut. Akitsornikuungami. Qangatut 6 koruuniinnaqarunaarluni massakkut 25 koruunit angullugit akeqarpoq, Johan Villadsen oqarpoq.

AAMMA ATUARUK Naalakkersuisut qaleralittassiisutit amerlivaat

Taamaattumik GrønlandsBankenip umiatsiaararsortunut atukkiiumajunnaarnera inuussutissarsiummik illersuinertut aalisartunit taakkuninnga marlunnit nalilerneqarpoq.

- Inuussutissarsiutigisariaqarparput qaleralik aalisartuusugut. Kikkut tamarmik aalisalissangaluarpata inuussutissarsiutigisinnaajunnaaratarsinnaavarput. Imminullu akilersinnaajunnaariataarsinnaavoq. Soorlu taanna GrønlandsBankenip ilimagigamiuk mattussineq aallartikkaa, Johan Villadsen oqarpoq.

Umiatsiaararsorlutik aalisartut pisassaminnik septembarip qaammataani kisimik qaffaavigineqanngillat. Aamma 6 meterinik anginerusunik angallatillit qaleralittassaat 1.023 tonsinik qaffaavigineqarput.