Umiarsuit ingiaqatigiittarnissaat qallunaat piumasaraat
Nunat tamalaat umiartornermut tunngassutilinnut kattuffissuanni IMO-mi Qallunaat Imarsiornermut qullersaqarfianneersut ataatsimiilerpata issittumi isumannaatsumik angalanissaq tunngavigalugu umiarsuit marlukkaarlutik angalaqatigiittalernissaanut maleruagassatut siunnersuut oqaluuserineqassaaq.
Qallunaat Imarsiornermut Qullersaqarfianni allaffissornermut qullersaq Per Sønderstrup atuagassiamut Ingeniørenimut taama oqarpoq.
- Takornariartaassuit kisimiillutik sikusiortartut ernumagisupilussuusarpavut. Ajutuussagaluarpatami imminuinnaq isumalluutigisariaqassammata, annaassiniartussammi ullut arlallit atorlugit ajutoorfimmukartariaqarsinnaammata. Taamaammat takornariartaassuit ikinnerpaamik marlukkaarlutik ingiaqatigiittalernissaat piumasaqaataasariaqaraluarpoq, Per Sønderstrup oqarpoq.
Ullumi ataatsimiinneq aallartippat, issittumi umiartornermi maleruagassat Polarkode-nik taagorneqartut aappaaguagu atuutilinnginnerini, qallunaat Imarsiornermut Qullersaqarfiat piumasaqaatinik allanik ilanngussiumalluni IMO-mut uteriisaarniarpoq.
Danmarki kisimi naalagaasinnaasuuppat maani nunatsinni sinerissamut qanittumi ilaatigut sikoqartaqisumi angallattunut piumasaqaatit takornariartaassuarnut aamma atuutsinneqalissagaluarput. Piumasaqaatit pineqartut tassaapput umiarsuit sikusiutissanngorlugit sananeqarsimanissaannik piumasaqaat, aamma annanniuteqarnissamut sumiissusersiuteqarnissamullu piumasaqaatit.
DTU-mi tassa Danmarks Tekniske Universitetimi sivisuumik ilisimatusarsimasup Hans Otto Kristensenip oqaatigaa, ingiaqateqarluni angalasarnissamik aamma umiarsuit sikusiutaasinnaanissaannik piumasaqaatit pisariaqarluinnartuusut.
- Takornariartaassuit - ingammik kisimiittut - issittup imartaani angallattariaqanngikkaluarput. Tassami umiarsuaq Costa Concordiatut ittoq 4.200-nik ilaasulik issittumi putusuussagaluarpat ajunaarnersuarmik kinguneqarsinnaalluarpoq, Hans Otto Kristensen Ingeniørenimut taama oqarpoq.
Nunatta imartaani takornariartaassuit angalasartut qallunaat imarsiornermut qullersaqarfianneersut misissuiffigisarsimasaasa amerlanersaanni, isumannaallisaaneq ajunngitsuusoq Per Sønderstrupip ilanngullugu oqaatigaa.
Nunat tamalaat umiartornermut tunngassutilinnik kattuffissuata IMO-p maleruagassaani issittumut tunngassutilimmik tapiliussassap Polarkode-mik taagorneqartup ukiut marluk qaangiutsinnagit akuerineqarnissaa naatsorsuutigineqarpoq.
