Assit: Umiarsuaq 101-nik pisoqaassusilik Nuummut aqqusaartoq
Umiarsuaq Maud Norgemiup Roald Amundsenip ilisimasassarsiornermini atorsimasaa Canadami Nunavumiit angerlaanneqartussanngorluni Nuummut aqqusaarunneqarpoq.
- Norgep avannaani Vollenimiit ukiut 100-t matuma siorna, tassa juulip 18-iani 1918-mi aallarpoq. Ukiunik 100-nngortorsiorneqarnissaanut inortuilaassagunarpugut. Kisianni oqaatigiinnarsinnaavara Maud tassaammat norgemiut umiarsuaanni kisiartaalluni Qalasersuaq avannarleq eqqaqqullugu angalasimasoq, ikiorteqalaaraluarlunilu angerlaqqittoq, suliami aqutsisoq Jan Wanggaard oqarpoq.
AAMMA ATUARUK Roald Amundsenip katersai Nunavummut utertinneqartut
Maud issittumi ilisimasassarsiortup Roald Amundsenip 1917-mi sanatippaa. Taassuma umiarsuaq sikkutsillugu ilisimasassarsiornermi misissuiffiussasoq taamani siunertaraa. Sikkutsinneranilu sikut ingerlaaqatigalugit Qalasersuaq avannarlermukarusaassasoq naatsorsuutigisimallugu. Maudili Nunavumi ikkannersami 1930-mi kivivoq.
Umiarsuup nutaanngililersimanera takuneqarsinnaavoq, sinaatungaanilu sikumut attuussarsimaneri aamma ersarilluinnarlutik. Maudillu Aasianni ukiisimasup, Nuummiit Norgemut sapaatip akunnerini pingasuni angerlamukarusaarnissaa naatsorsuutigineqarpoq.
AAMMA ATUARUK Amundsenip umiarsuaa kingulleq Norgeliaanneqalersoq
- Sanalluarneqarsimaqigami aqqutaani ajunngivissumik inge
rlaaqataavoq. Ukiunimi 85-ni kiveqqasimavoq, kisianni umiarsuup ilarujussua suli amiakkuuvoq, suliami aqutsisoq Jan Wanggaard oqarpoq.
Umiarsuup Nuummiit ataasinngorpat aallaruteqqinnissaa naatsorsuutigineqarpoq, silali apeqqutaajumaassaaq.
Maud pillugu facebookimi quppernermi Maud returns home-mi annertunerusumik paasisaqarsinnaavutit.
AAMMA ATUARUK Amundsenip umiarsuaa Aasianni ukiissasoq
