Amundsenip umiarsuaa kingulleq Norgeliaanneqalersoq

Roald Amundsenip umiarsuaa kingulleq MAUD Norgemut kiisami angerlartinneqalerpoq.
Assi © : wikipedia.org
juulip 29-at 2015 05:04
Nutserisoq Simon Uldum -

Roald Amundsen norgemiut issittumi ilisimasassarsiortut ilisarisimaneqarnerpaartaraat.

Siullersaalluni Sullualukkoortuuvoq, tamannalu piffissami 1903-1906-imi pivoq. Gjoa Havenip eqqaani (Uqsuqtuuq) ukiivoq inuuniarnissamullu periutsinik naggueqatigiit Inuit Netsilimmeersut ilinniarfigalugit. Ilikkakkanilu atorlugit kingorna siullersaalluni Qalasersuaq Kujalleq anguaa.

Aammattaaq Avannaarsuata kangimut aqqutaa qalasersuarlu ilisimasassarsiorfigisimavai. Umiarsuaali kingulleq MAUD sumiiffinni arlalinni sikkussaasarpoq naggataatigullu Amundsenip akiligassaqarfigisaanit arsaarinnissutigineqarluni.

Akiligassaqarfigisaata umiarsuaq MAUD Cambridge Bayimut (Iqaluktuuttiaq) qimappaat, 1930-miillu tassaniilerpoq.

 

Oqaluttuarisaanermut pingaarutilik

Norgelli tungaanit umiarsuup utertinneqarnissaa sivisuumik kissaatigineqarpoq, nunamut tulluusimaarutaanera oqaluttuarisaanermullu pingaaruteqassusia pissutigalugit.

Ukiuni arlalissuarni isumaqatigiinniutigineqareersoq sapaatit-akunnerani uani imaanit mianersuullugu qaqinneqassaaq Norgemullu nassiunneqarluni.

Jan Wanggard, umiarsuarmik qaqitsisussaneersoq nutaarsiassaqartitsivimmut CBC Newsimut oqarpoq umiarsuup Norgeliaannissaa akisuupilussuussasoq. Umiarsuarmillu taamatut annaassiniarnerit siullersarimmassuk qanorpiaq    akeqassanersoq ilisimaneqanngikkallarpoq, Wanggard taama oqarpoq.