Roald Amundsenip katersai Nunavummut utertinneqartut

Ukiut hundredilikkuutaat siuliini, 1903-mit 1905-imut, Norgemiu issittumi ilisimasassarsiortoq, Roald Amundsen, Nunavummi nunaqarfimmi  Uqsuqtuumi ukiivoq.

Uqsuqtuumiitilluni Inuit Netsilimmeersut suarsuutaannik 1000-it missaanniittunik niueruteqatigisimavai paarlaasseqatigalugillu. Amerlanersaat ulluinnarsiutaapput, soorlu sakkut, iganermut atortut, unaat, tuttup amiinillu atisaliat.

Roald Amundsen Norgemut uterami katersani tamaasa Oslomi Ilisimatusarfimmut tunniussimavai, tassanilu pigineqartuarsimallutik.

Atortut ilaat aasaq manna utertinneqarput allallu aamma nassiunneqartussaallutik. Uqsuqtuumi borgmesterip, Joanni Sallerinap, tusagassiorfinnut oqaatigaa qangarnitsat siuliminnit pissarsiarineqarsimasut takullugit nuannersoq aammalu nammineq katersugaasivimminni saqqummersinneqartussanngorneri nuannersuusoq, taamaaliornikkummi inuusuttortamik utoqqartamillu takullugit ilinniarfigisinnaammatigik.

Uqsuqtuumi kulturikkut illorsuup sanaartorneqarnera manna naammassineqalerpoq, tassanilu aamma katersugaasiveqassaaq, utertinneqartullu tassani saqqummersinneqarumaarput.

Kulturikkut illorsuup takornarianit ilisimatuunillu Nestilimmi Inuit kulturiannik paasisaqarusuttunit ornigarneqartarnissaa ilimagineqarpoq.