Umiarsuaatileqatigiiffik: Kalaallit Nunaata niueqatiginera maanna ajornaannerulissaaq
Royal Arctic Linep oqariartuutaa naapertorlugu nunarput nunarsuup sinneranut ajornaannerusumik maanna niueqateqarsinnaanngorpoq. Umiarsuaateqatigiiffiup islandimiut umiarsuaatileqatigiiffianik, Umiarsuaatileqatigiiffiup islandimiut umiarsuaatileqatigiiffiat Eimskip imaatigut assartuinermi ullumikkut suleqatigilerpaa.
Suleqatigiilerneq Royal Arctic Linep umiarsualivinnut amerlanerusunut maanna angalasalerneranik isumaqarpoq. Umiarsuaatileqatigiiffik Eimskipip aqqutigisartagaanut ilaatigut ingerlaarsinnaalerpoq. Tassalu Nunat Avannarlernit, Europamit, Amerikap avannaanut Canadamullu ingerlaarfiit.
AAMMA ATUARUK RAL-i Islandimiullu umiarsuaatileqatigiiffiat suleqatigiinnissaat akuerineqartoq
Royal Arctic Linemut tamanna pissannganarlunilu eqqaamajuagassaassallunilu, piffissarmi Kalaallit Nunaata ilaatigut ingerlaarfigisartagaa ukiuni 246-ni atuussimasoq allanngortoq, Royal Arctic Linep pisortaa, Verner Hammeken oqarpoq.
- Kalaallit Nunaanni assartuinerup iluani periutsit eqaannerusut iserfigisussanngorpagut. Assartuinikkut aaqqissuussineq nunarsuarmi sumiikkaluaraanniluunniit Kalaallit Nunaata ajornannginnerusumik niueqatigineqarsinnaaneranik kinguneqartussaq, taanna nangilluni oqarpoq.
Suleqatigiinnermi umiarsuaq, Tukuma Arctica assartuinermi siulliussaaq. Taanna Aalborgimit Aarhusimut ingerlariarluni Reykjavikkikkooriarluni Nuummukassaaq.
AAMMA ATUARUK Royal Arctic Line USA-mut aqqummik nutaamik ammaalerpoq
Royal Arctic Linep oqarnera naapertorlugu imaatigut assartuineq aallaqqaammut marlunnut avittariaqarallassavaa. Tamanna Eimskipip umiarsuaanit marlunnik ataaseq Kinami amutsivimmi kinguaattooqqaneranik pissuteqarpoq.