Royal Arctic Line USA-mut aqqummik nutaamik ammaalerpoq
Danmarkip ministeriunerata Mette Frederiksenip nunatsinnut pisortatigoortumik tikeraarnerminut atatillugu Royal Arctic Line (RAL) ippassaq ataasinngornermi pulaarpaa.
Pisortaaneq Verner Hammeken naapippaa nunattalu niueqatiginerata siunissami qanoq ilillugu ajornannginnerulersissinnaanera oqaluuseraat.
Kalaallit Nunaata niueqatiginerata ajornannginnerulernissaanik periusissap ilaatut niuernikkut aqqutissanik nutaanik pilersitsisoqassaaq. Ilaatigullu USA-mut aqqummik nutaamik pilersitsinissaq pilersaarutigineqarpoq, taannalu pilersaarutit malillugit 2020-mi februaarip qaammataani atuutilissaaq
Suliaqarfitta ilaa taanna Mette Frederiksenip RAL-imi ataasinngornermi ataatsimeeqatigineqarnerani aamma oqaluuserineqarpoq.
- Isumaqarpunga RAL-ip attaveqarnermi pingaarutilimmik inissisimanera Mette Frederiksenip paasilluaraa, aammali suliffeqarfiusugut siunissaq eqqarsaatigalugu niuernikkut attaveqaatinik nukittorsaanermi suleqataasussaq. Tamanna aamma Royal Arctic Linep USA-p niueqatiginerata ajornannginnerulersinnissaanik kissaateqarneranik USA-mut paasititsissaaq, Verner Hammeken oqarpoq.