RAL-i Islandimiullu umiarsuaatileqatigiiffiat suleqatigiinnissaat akuerineqartoq
Taakku suleqatigiinnissaat Islandimi unammilleqatigiinnermut oqartussat akuersissuteqarnerat umiarsuaatileqatigiiffiup allap Samskipip naammagittaalliuutigaa, taannali itigartitsissutigineqarpoq taamaalilluni Royal Arctic Linep Eimskipillu ingerlaaqatigiittalernissaat nalunarunnaarpoq.
Nunatta Islandillu akornanni immakkut angallanneq pisariillisarniarlugu ukiup naanerani ingerlaaqatigiittoqalernissaa pilersaarutaagaluartoq aappaagu 2020-mi aatsaat aallartissaaq.
Tyfoni kinguaattoortitsisoq
Umiarsuit nutaat angalanermi atorneqartussat sananeqarneri kinguaattoornerat pissutaavoq.
Umiarsuit Kinami sananeqarput, kiattulluni anorersuata tyfonip kiarujussuarneratalu sanaartornermut kinguaattoortitsipput Royal Arctic Line tusagassiuutinut nalunaarummi allappoq.
- Teknikkikkut atortorissaarutit ilaannik ikkussuinerit naatsorsuutigisamit aamma sivisunerunissaat paasineqarluni, Royal Arctic Linemi Umiarsuarnik ingerlatsinermut immikkoortortaqarfimmi pisortaq, Anders Bay Larsen, taama oqarpoq.
AAMMA ATUARUK Royal Arctic Line USA-mut aqqummik nutaamik ammaalerpoq
Umiarsuit pingasut sananeqarput, ataaseq Royal Arctic Linemit pigineqarpoq, sinneri Eimskippimit. Pilersaarutit malillugit suliaq maanna ingerlavoq, oktobarillu naalernerani angalaneq qaqugu aallartissanersoq nalunaarutigineqassalluni.
Royal Arctic Line angalanissamik pilersaarutaagallartussaq pillugu sullitaminut piaartumik allagaqassaaq. Taanna ukiup sinneranut, kiisalu 2020-mi ukiup sisamararterutaanut siullermut atuutissaaq.
AAMMA ATUARUK Royal Arctic Line suleqatissarsisoq