Royal Arctic Line suleqatissarsisoq

Islandimiut umiarsuaatileqatigiiffiata Eimskibip Royal Arctic Linemut suleqatiginninniarnini ullumi akuersissutigaa,

Royal Arctic Line tusagassiorfimmut nalunaarummi taama allappoq.

Taamaalilluni Royal Arctic Line nunatsinniit nunatsinnullu assartuussinissamut periarfissatsialammik isumaqatigiissuteqarpoq.

- Maanna Islandimut Islandimiillu pissutsit nunani allani atuuttut assigalugit ingerlaalersinnaagatta qujanarpoq, tassami kiffartuussinikkut unammillersinnaanngorpugut, tamannalu ilutigalugu umiarsuarmi inissaq akisooq aamma avissinnaanngussallutigu. Taamaaliornitsinni aningaasartuutigut avatangiisinullu nanertuutaasinnaasut annikillisissavagut, Royal Arctic Linep pisortaanera Verner Hammeken tusagassiorfinnut allappoq.
 
Umiarsuaatileqatigiiffik RAL-illu suleqatigiilerneratigut maanna Royal Arctic Line Islandip Europallu akornanni assartugassanut neqeroorsinnaanngorpoq.

Umiarsuaq assartuisussat pilersaarutit malillugit siulleq ukioq manna decembarimi assartueqqaassaaq.

RAL-ip Eimskibillu umiarsuit imarpikkoortaatit pingasut pisiai pilersaarutit malillugit ukiaru naammassineqassapput.

Umiarsuaq imarpikkoortaat ataaseq Royal Arctic Linemit pigineqarpoq sinnerilu marluk Islandemi umiarsuaatileqatigiiffimmit pigineqarput.