Ullumi anorlingaatsiassaaq. Mianersorisi, politiit mianersoqqusipput
Nunatta kitaani ullumi ukiaanerani anorersuarpoq. Pingaartumik Nuup Sisimiullu akornanni nalunaaquttap 16 aamma 20 akornanni silamiissaguit mianersussaatit.
Tassami kujataanit anorersuarmik anorsarissaaq anorersuarluniluunniit, anoraasuarsuartullu sakkortutigisumik anoraasuartarsinnaassalluni.
Taama Nuummi DMI nalunaaruteqarpoq.
- Anorip anorsarinnerata anorersuullu akornanniinnissaa ulussaarsuartullu sakkortutigisumik anoraasuartarnissaa naatsorsuutigaarput, Mads Kristensen, Nuummi DMI-mi silasiortuni pigaartoq, oqarpoq.
Anorimut sakkortuumut ilutigitillugu siallingaatsiassaaq, sila pikkunartutut misinnartilerlugu, silasiortoq oqaluttuarpoq.
Kalaallit Nunaanni Politiit innuttaasunut innersuussutigaat atortut oqittunnguit eqquteqqullugit.
- Eqqumaffigaarput avammulli nalunaaruteqarata, kisianni innuttaasunut innersuussutigerusupparput pisuinnaagaanni biileraanniluunniit teqqalasunut mianersoqqullugit, Kalaallit Nunaanni Politiini pigaartut pisortaat Preben Kleist oqarpoq.
Tupinnanngitsumik Air Greenlandip timmisartuutini nunamiitiinnarpai. Paamiuniit Sisimiunut timmisartuussinissat amerlanersaat taamaatiinnarneqarsimasut ingerlatseqatigiiffimmit nalunaarutigineqarpoq. Sapaatiuppalli Københavnimut Københavnimiillu timmisartuussinissamik ilassuteqartoqarsimavoq.