Ulluinnarni ajunngitsuliortartup assilinera frimærkiliarineqartoq: Isumaqaraluarama piaarineqarlunga

79-inik ukiulik Rebekka Olsvig ingerlaqatiginiarukku makiaartariaqarput. Rebekka Olsvigimi ulluinnarni eqeersimaartuuvoq. 

Qimminimmi aneerussineq, ullaakkut nalunneq, sulorarneq assammillu arsarneq sapaatit akunnerata massuma ingerlanerani taassuma pisassaanut sammisassaanullu ilaapput. 

Rebekka Olsvigili tamatuma saniatigut meeqqanut kajumissutsimik ukiorpassuarni suleqataasarpoq. Tamannarpiarlu Tusassip malunnartinniarlugu Rebekka Olsvigip assilinera frimækilianik ´Kalaallit Nunaanni ulluinnarni ajunngitsuliortut´-mik qulequtaqatigiiaanik nutaanik marlunnik ukioq manna saqqummersitassaminut ilanngunniarlugu aalajangerpoq. 

- Kajumissutsimik suleqataasarnitsinnut nersorniarneqarnerput usorsinnaqaaq, Rebekka Olsvig oqarpoq. 

Tusass frimærkilianik ´Kalaallit Nunaanni ulluinnarni ajunngitsuliortut´-mik qulequtaqatigiiaanik siorna saqqummersitsisalerpoq. Tassa nunatsinni ulluinnarni ajunngitsuliortut nersorniarlugit taamaaliortalerpoq. 

Rebekka Olsvig Ilulissani peroriartorpoq, Nuummulli 1962-imi nuulluni. Akileraartarnermut aqutsisoqarfimmi ilinniarsimasuuvoq naatsorsuuserisutullu ukiorpassuarni namminersortuulluni. 

Frimærkiliarineqarsimalluni oqarfigineqarami tupaallassimalluni, taanna aamma oqarpoq. 

- Sooq uanga? Paatsuungavunga, Rebekka Olsvig oqarpoq.  

- Sianerfigineqarama isumaqaraluarama piaarineqarlunga. 

Rebekka Olsvig kajumissutsimik ajunngitsuliorluni suliaqartuunerminut Kommuneqarfik Sermersuumit Red Barnet Grønlandimillu aamma nersorneqarnikuuvoq.

Rebekka Olsvig ajunngitsuliorluni suliaqartuunerminut nersorneqartareernikuuvoq. Assi © : KNR / Sebastian Trosborg

Kajumissutsimik suliaqartuunerup nuannersua

Rebekka Olsvig soorlu sulorarnermik sisorarnermillu meeqqanut sammisassaqartitsinermik suliaqartarpoq. 

- Ilaqutariit meerartallit taamaalillutik puigunaatsorsisarput, aamma meeqqat angajoqqaallu sammisaqaqatigiinnermikkut aamma ataqatigiilluarnerulersarput, taanna oqarpoq.  

Rebekka Olsvigip assigiinngitsorpassuarnik sammisassaqartitsisarnera ilaqutariinniinnaanngitsoq nuannaarutaasarpoq, nammineerlunimi aamma pissarsiaqaatigilluarnerartarpaa.

- Meeqqat angajoqqaavisalu ilagitilluta nuannersaraangata soorunalimi qiimmannartaqaaq. Pissarsiaqaatigisaqaara, Rebekka Olsvig oqarpoq.

Rebekka Olsvig inussiortuullunilu ilassiortuuvoq. Taamaanneratalu ilaqutariinnut pissakitsunut kajumissutsimik ukiorpassuarnik suleqataasarneranut aallaaviugunavippoq. 

- Taamaalillunga ikinnguterpassuaqalertarpunga, taavalu inuunerma sinnera tamaat ikinngutigivakka taakkua. Nuannarilerlugit siullermik ilisimasarinngikkaluit, tassa taamaalilluni aamma inuppassuit ilisarisimalernartarput. 

Frimærkit pisiarisinnaasatit ima isikkoqarput. Assi © : KNR / Sebastian Trosborg

Igen i år er der to udgaver af Hverdagens Helte i Grønland, mens det også er kunstneren Lisbeth Karline, der igen har stået for motiverne til frimærkerne. 

Nunatsinni Ajunngitsuliortut marluk ukioq manna aamma nersorniarneqarput, eqqumiitsuliortorlu Lisbeth Karline frimærkinut assiliartaliisooqqilluni.

Rebekka Olsvigip saniatigut Nanna Knudsen ukioq manna Ajunngitsuliortuni frimærkit ilaanniippoq. Taassuma ukiorpassuarni oqalutsit inuillu akornanni paaseqatigiinnissaq sulissutigissutigimavaa.