Rebekka Olsvigip matusinissaq uggoraa: Nakorsiarnissaq anniarnissarlu pinngitsoortittarpakka
Rebekka Olsvig 78-inik ukioqarpoq. Nuummilu 2003-mi ammarmalli naluttalersimalluni.
- Taamatut ukioqarlunga nakorsiartarnissaraluara pissarsiuteqarfigaara nappaatissaraluakka imaluunniit anniaatissaraluakka peertarmata, taanna naluttarfiup killingani uninngallatsiarnermini KNR-imut oqarpoq.
Rebekka Olsvig 72-inik ukioqarluni soraarninngorami nalussinnaanngilaq. Maannakkulli nalussinnaalersimavoq. Taanna sapaatip akunneranut pingasoriarluni akunnerit marluk naluttarpoq.
- Pikkorillingaarama tassami maaniinnermut, meeqqat isiginnaartarakkit qanoq iliortut nalullaqqisserujussuarnikuuvunga ataatigullu, taanna oqarpoq.
Nungullartoq, aserortertoq ussiisorlu
Rebekka Olsvigimulli allarpassuarnullu Naluttarfik Malimmik atuisartunut aporfeqarpoq, naluttarfimmi 30 millionit koruunit missaannik naleqartumik annertuumik nutarterneqartussanngorpoq. Taamaaliornissamullu sanasut inissaqartinniarlugit naluttarfik ukiup ataatsip missaani matoqqassaaq.
Naluttarfiup illutaa tamarmi nungullarlunilu aserortilersimavoq, sanaartornissamullu pilersaarummut nassuiaaneq naapertorlugu sannaani arlalinnik ussiitsoqarpoq. Tamatuma saniatigut silaannarissarfimmik nutaamik pilersitsisoqassaaq naluttarfittaatalu naqqani folia taarserneqassasoq allassimavoq.
Iikkamut qalliutai tamarmik taarserneqassapput.
Naluttarfik qaqugu matuneqassanersoq suli ilisimaneqanngilaq.
- Una folie ukiut arfineq pingasut sinnerlugit atareernikuuvoq, oqartarput ukiut tallimaniit ukiut arfineq pingasut atasinnaasartut, kisanni una qujanartumik suliarilluarneqarnikuusimagami massakkut immaqa ukiut qulit sinnerpagut atulermalli kisianni aamma takuneqarsinnaavoq kælderimukaraanni ikeratigut kuuttoq annertusigaluttuinnartoq, naluttarfiup naalagaa, Daniel Kâjangmat Lyberth oqarpoq.
- Atuisut ulluinnarni oqaluuttarlugit isigisarlugit qanoq iluaqutigisartigineraat, tassa nuannerpallaanngilaq uaguulluni taama sivisutigisumik matoqqanissaq, suliarineqarnissaa uggornarpoq atuisunut, taanna oqarpoq.
Atuisut siorna 178.000-iusut
Rebekka Olsvigilu aamma taama isumaqarpoq.
- Soorunalimi eqqarsaatikkut assut nanertisimassaanga nalunngilara pissutigalugu maaniikkaangama aamma eqqarsaatikkut nuannaalerlunga inuillu naapillugit timeralu atorlugu iluaqutigisarakku, taanna oqarpoq.
Ukiuni kingullerni tallimani atuisut 130.000-t missaaniittaraluartut siorna nalukkiarsimasut 178.000-t angusimavaat.
Kikkut iluarsartuussinermik suliaqassanersut suli inissinneqanngilaq.
