Ulloq unnuarlu paaqqutarinniffik meeqqanut minnerpaamut immikkoortortamik amigaatigineqartumik ammaalersoq
![](/sites/default/files/styles/image_934x467/public/2024-08/Nuka%20Fleischer%20stills.00_16_59_25.Still004.jpg?itok=1qb5F3D4)
Nuummi Mølkebøttenimi nutarterineq annertooq aallartisarneqarpoq. Sanaartorfigineqassaaq, angerlarsimaffiullu avataanut inissiisarfimmik immikkoortortamik nutaamik ammaasoqassasoq, Mølkebøttenimi aqutsisoq, Nuka Fleischer oqarpoq.
- Meeqqanut ukioqanngitsunit pingasunik ukiulinnut, kommunimit angerlarsimaffiup avataanut inissinneqartussatut nalilerneqarsimasunut immikkoortortamik nutaamik ammaassaagut, Nuka Fliescher oqarpoq.
Mælkebøtten kommunit peqqinnissaqarfilluunniit saaffiginnikkaangata maannamut itigartitsisariaqartarsimavoq, tamatumalu saniatigut Mælkebøttenip meeqqanut piaartumik suliniuteqartoqartarnissaata pingaassusaanik suaarutiginneqataanikuuvoq.
- Taamaammat aamma tamanna pisariaqartinneqarpat aaqqiissutissap ilaaniittariaqarpugut, aqutsisoq oqarpoq.
Angerlaqqissasut
- Meeqqat uagutsinnut inissinneqaqqagallartarnissaat immikkoortortamut anguniagaraarput, Mælkebøttenimit ukiuni kingullerni marlunni aqutsisoq, Nuka Fleischer oqarpoq.
Meeqqat inissinneqaqqagallaannarnissaannik siunertaqarnerani centerip meeqqanik soorunami ukkataqangaatsiarniarneranik kisianni aamma angajoqqaanik aamma meeqqap angajoqqaallu akornanni attaveqaammik ukkataqarusunneranik pissuteqarpoq, meeqqat taamaalillutik angerlarsimaffimminnut angerlaqqissinnaalersinnaassallutik.
- Meeqqanik inissinneqartussanik tigusinitta saniatigut meeqqanik misissuinissamik neqerooruteqarniarpugut, kisianni aamma angajoqqaat pisariaqartitsisut angajoqqaajunissaannut angajoqqaatut piginnaasanik sungiusartinneqartassapput.
- Kommunit sulianillu isumaginnittut piffissaqarnissaat maanna ajornakusoorsinnaasoq maluginiarparput, kisianni meeqqap angajoqqaallu attaveqaataannik najoqatigiinnissaannillu attassinissaq pingaaruteqartorujussuuvoq. Meeqqat angajoqqaaminnik najoqatiginninnerpaat attaveqarnerpaallu ingerlalluarnerpaasarlutit misilittagaraarput, taamaammat meeqqat angerlaqqittut amerlanerulernissaat neriuutigalugu tamanna pitsanngorsaaqataaffiginiarparput, Nuka Fleischer oqarpoq.
Sulisussaqarnerunissaa pisariaqartoq
Immikkoortortaq nutaaq illorsuarmi maanna piusup ilaani allerpaami pilersinneqassaaq, sullivillu illoqarfimmi meeqqat tamarmik ullut tamaasa atorsinnaasaat ilassutitut sanaartukkamut nuunneqassalluni.
Immikkoortortamilli nutaamik allamik matusinani ammaaneq ulluinnarni amerlanerusunik sulisoqarfiusariaqarpoq. Nuka Fleischerillu perorsaasutut ilinniarsimasut nutaat aqqaneq-marluk ukioq ataaseq qaangiuppat tikilluaqqusinnaassallugit neriuutigaa.
- Perorsaasutut ilinniarsimasunik aqqaneq-marlunni pissarsisinnaanissaq takorluugaavoq, kisianni misilittagaqarluartunut aamma inunnut isumaninnermi ikiortitut isumaginninnermilu sulisutut tunuliaqutaqartunut ammavugut, Nuka Fleischer oqarpoq.
Aqutsisup sulisussanut nutaanut pilersisaariniarluni Perorsaanermik Ilinniarfik Ilulissaniittoq ilaatigut aqqusaassavaa, Mølkebøttencenterilu immikkoortortaqarfillu nutaaq oqaluttuaralugu.
Aili immikkoortortaqarfiup taaguutissaa ammarpat meeqqat Mølkebøttenimiissinnaasut 24-nit 31-nut amerlineqassapput.
Meeqqat 24-t Nuummi najukkani assigiinngitsuni pingasuni ullumikkut agguataaqqapput. Immikkoortortaqarfiit tassaapput pinasuartumik inissinneqartunut immikkoortortaq aamma najugaqarfiit marluk.
Nutarterineq immikkoortortarlu nutaaq aappaagu septembarimi piariissangatinneqarput.