Meeqqanut tarnimikkut erloqissutilinnut ulloq unnuarlu angerlarsimaffeqalissasoq
Meeqqat tarnimikkut erloqissuteqartut Nuummi ulloq unnuarlu angerlarsimaffissaat nutaarluinnaq ukiualuit qaangiuppata piariissaaq.
Aningaasaqarnermut Akileraartarnermullu Ataatsimiititaliap naalakkersuisut suliniummut aningaasanik qinnuteqaataanik akuersinerata kingorna tamanna pilersaarutaalerpoq. Ineqarnermut Attaveqaasersuutinullu Naalakkersuisoqarfimmit tusagassiuutinut nalunaarummi tamanna allassimavoq.
- Nuannaarutigaara, Nuummi ulloq unnuarlu angerlarsimaffissap nutaap suliarineqarnissaa maanna aallartissinnaalermat. Suliassaq pisariusoq, avatangiisitigut sinaakkutissanik, meeqqat immikkut pisariaqartitaannut naleqqussakkanik pitsaasunik pilersitsinissamik annertuumik pingaartitsiffiusoq matumani pineqarpoq, ineqarnermut attaveqaasersuutinullu naalakkersuisoq Hans Peter Poulsen tusagassiuutinut nalunaarummi oqarpoq.
Suliassaqarfik ilungersorfiusoq
Ulloq unnuarlu angerlarsimaffeqarneq piffissami matumani pingaartumik ilungersorfiusoq, aningaasaliinerulli nutaap sanaartornissaq maanna aallartissinnaalersippaa.
Tamannalu meeqqanut inuusuttunullu naalakkersuisup, Aqqaluaq B. Egedep (IA) suliniummi politikkikkut suliaqartut ilaat oqarpoq:
- Ulloq unnuarlu angerlarsimaffeqarneq artorsarfiuvoq, aammalu meeqqat ulloq unnuarlu angerlarsimaffinnut inissinneqartartut amerliartortut takusinnaavarput. Meeqqanut tarnimikkut erloqissutilinnut ulloq unnuarlu angerlarsimaffiup Nuummiittussap sananeqarneratigut ulloq unnuarlu angerlarsimaffinni pisinnaasat amerlissapput, taanna tusagassiuutinut nalunaarummi oqarpoq.
Ulloq unnuarlu angerlarsimaffik Nuummi Nuussuarmi sanaartorneqartussaq pilersaarut malillugit 20-nut inissaqartitsissaaq, taakkulu immikkoortunut pingasunut agguataarsimassapput. Tamatuma saniatigut allaffeqassaaq aamma sammisaqartitsinermut ilinniartitsinermullu immikkoortortaqassalluni.
Angerlarsimaffik meeqqanut arfineq-pingasunit 18-inut ukiulinnut ulloq unnuarlu angerlarsimaffimmut inissinneqarnissamik, imaluunniit perorsaanikkut tarnikkullu misissorneqarnissamik pisariaqartitsisunut atugassiaassaaq. Angerlarsimaffiup 2026-mi aggustimi piareersimanissaa anguniagaavoq.
