Assammik arsarneq: Uku inuusuttuni Kinami VM-qataassapput

Assammik arsarnermi inuusuttunut nuna tamakkerlugu sungiusaasoq Victoria Budek Svendsen arsartunik 16-nik toqqaavoq augustimi inuusuttut VM-qarneranni Nunarput sinnerlugu unammisussanik.

Allattoq Noah Mølgaard

juulip 05-at 2024 11:09

Assammik arsarnermi Nunarput augustimi peqataaqqilerpoq.

Tamatumuuna peqataasussat tassaapput niviarsissat U-18-it nunanut sakkortuunut soorlu Danmarkimut augustip 14-aniit unammisussat.

Nuna tamakkerlugu sungiusaasoq Victoria Budek Svendsen siuariartoqqinnissamut ilimanaatilinnut alaatsinaalluni toqqaavoq.

- Soorunami iligiit suleqatigiilluarsinnaasut toqqarniarsimavakka aamma ataatsimooqatigiilluartartut, Victoria Budek Svendsen KNR-mut oqarpoq.

- Aammali maluginiarpakka arsartutta siuariartoqqinnissamut piukkunnassusaat. Assut pingaartitarivarput arsartut inersimasuni nunanut allanut unammisartunngornissamut piareertinnissaat, kalaallit sungiusaasuat oqarpoq.

U-18-ni assammik arsarnermi VM-qataasussat

Amáunalik Geisler Møller – SAK
Arnannguaq Berthelsen – N-48
Bea Mathæussen Jensen – GSS
Hannah Steenholdt Petersen – GSS
Hannah Nielsen Kleist – SAK
Ivaana Ravn Lennert Petersen – GSS
Jaliina Lund Jakobsen – GSS
Kira Brandt Petersen – GSS
Madeline Lundbæk Bjørnestad – Furesø
Nadia Lundblad – GSS
Najaaja Rossen Petersen – GSS
Najaaraq Heilmann – GSS
Niviaq Skifte Knudsen – GSS
Pilunnguaq Olsen Petersen – FIF
Parma Kreutzmann – GSS
Tukummeq Kleist Berthelsen – Ikast

Sungiusaasoq: Victoria Budek Svendsen
Sungiusaasup ikiortaa: Elisabeth Sørensen Budek
Tagiartuisartoq: Kenneth Stage Morgenstjerne
Angalanermi aqutsisoq: Kurt Lauritsen

Unammisassat mersernartut

Kalaallit puljeqatigissavaat aaqqissuisut Kina, Danmark aamma Kinap ilaa Taipei.

- Unammisassatsinnut sanilliulluta timikkut tuannerugunarpugut. Assersuutigalugu Danmark unammersuarnerni ajugaassagatinneqartut ilaat unammissavarput, Victoria Budek Svendsen oqarpoq.

- Uagutsinniit aamma piareersarnerminni allaanerusunik atugassaqarnikuupput. Assersuineq eqqarsaatigalugu taama pikkoritsigisunut sassarnissaq suliassaavoq imaannaanngitsoq. Taamaattoq sapinngisarput tamaat unammiumaarpugut tamaviaarluta, Victoria Budek Svendsen oqarpoq.

Aamma atuaruk U-18 aamma sapinngillat: Kina-mut VM-riassapput

U-18-ni VM illoqarfimmi Chuzhou millionit sisamat sinnerlugit inulimmi pissaaq.

Streaming atorlugu isiginnaarneqarsinnaasoq Viaplay U-18-ni VM-rtoqarnissaanik aallakaatitsinissamut piginnaatitsissutinik pigisaqarpoq. Tamanna pissutigalugu unamminerit KNR-mi takutinneqarsinnaanngillat.

Nutaarsiassami kukkunermik nassaarsimaguit uunga allaffigineqarsinnaavugut.