Ukrainemiut 200.000-it kiassarneqarnissaannut 300 millioner koruuninik tapiissuteqartoqarpoq
Ukrainemiut tusintilikkaat qaammatit qiianarnerpaaffiini kissaalaartumiissinnaanissaat pillugu Danmark 300 millioner koruuninik tapiissuteqarpoq.
Aningaasat aningaasaateqarfimmit Ukrainefondenimeersut tapiissutigineqarput.
- Illoqarfimmi Mykolajivimi kiassaateqarfinnik 20-nik pisinissamut atorneqassapput,
Silap pissusia pillugu politikkimut tunngasuni Danmarkimi ministeri Dan Jørgensen taama oqarpoq.
Kiassaateqarfinnit pisortat allaffeqarfii napparsimmaviit allallu kiassarneqassapput.
Sorsuuttoqarnerani ajorluinnaqqissaartunik pisoqarnerata saniagut Ukrainimi nunap immikkoortuani Mykolajivimi innuttaasut kiassarsinnaannginnerat pissutsit ajornerulersippaat, Dan Jørgensen taama oqarpoq.
Aningaasat 300 millioner koruunit tapiissutigineqartut Ukrainemiunut 200.000-nut ikiuutaassapput.
Kiassaateqarfiit saniatigut sorsuttoqarnerani aseruatiterneqartut sanaartoqqinneqarnissaanut aningaasat atorneqartussaapput, aamma Danskit Ukrainemiullu komuuniisa suleqatigiinnerat nukittorsarneqassaaq.
Ukrainemi nunap immikkoortuata Mykolajvip ikiorneqarnissaanut Danmark pingaarutilittut inissisimavoq.
Danmark Mykolajivimi aallartitaqarfiup allaffianik qanittumi ammaavoq.
Allaffiup taassuma Danmarkimi qitiusumik allaffeqarfiata Mykolajivimmilu oqartussasut akornanni qanittumik oqaloqatigiittarnissaat qulakkeertussaavaa.
- Mykolajiffimi eqqaanilu oqartussaasunut qanittumik attaveqarnitsinnut iluaqutaavoq, Dan Jørgensen oqarpoq.
Ukrainemi kiassaateqarfinnik amerlanerusunik aningaasaliisoqarsinnaanera Dan Jørgensenip naatsorsuutigisinnaanerarpaa. Ukrainemi ukiuunerani qiianatarujussuusinnaasoq, Dan Jørgensen oqarpoq.