Ukrainemi inuit 42.000-t missaat qarsutsinersuaqarneranik navianartorsiortut

Ukrainemi sapusiarsuup Nova Kakhovkap qaartinneqarnerata kingunerisaanik qarsutsinersuaqarmat inuit 42.000-t missaanniittut navianartorsiorput.

Ukrainemi oqartussat taama naliliisut, nutaarsiassaqartitsivik Reuters allappoq.

Sapusiarsuup qaartinneqarnerata kingunerisaanik tamanna akerariit innuttaannut tuusintilikkaanut, tassa Ukrainemiunut russinullu, annertuumik kingunerluttussaassasoq, FN-ip ikiuiniarnermut qullersaa Martin Griffiths oqarpoq.

Ukrainimiut qasserpiaat qarsutsinersuarmi ajunaarsimanersut, Ukrainemi oqartussanit suli nalunaarsorneqarsimanngillat.

Russilli arfineq-marlunnit ikinnerunngitsut maqaasineqartut Ruslandimiit ullaaq manna nalunaarutigineqartoq, russit nutaarsiassaqartitsiviat Tass allappoq.

Sapusiarsuaq qaartinneqartoq 30 meterisut portussuseqarpoq, 3,2 kilometerinillu isorartutigisumik tasiliarsuaq, 18 kubikkilometerisut annertutigisumik imeqarfeqartoq, assiaqutserneqarsimalluni.

Sapusiarsuarmik kikkut qaartitsisuunersut suli ilisimaneqanngilaq. Ukrainemiut oqarput russit taamaaliorsimasut russilli oqarlutik Ukrainemiut tamanna piliarigaat.

Qeqertaasaq Krim, russit 2014-imi tiguarneqartoq, sapusiarsuup ernganik pilersorneqarpoq.