Stoltenberg: Ukraine sorsunnermi ajugaajartuaarpoq
Ukraine ajugaajartuaarpoq, Natop generalsekretæria taama ullaaq oqarsimavoq.
Nunat killiit illersoqatigiiffiani tassa NATO-mi generalsekretæri Jens Stoltenberg ullaaq manna Europa-Parlamentimi ataatsimiinnermi taama oqarsimavoq.
- Russit sakkutuui qaangertarpaat siumut ingerlapput, taanna taama issuarneqarpoq nangipporlu:
- Taamaattoqarneranut ersersitsivoq tapersersuinitta pingaaruteqarneranik aammalu tapersersuinerput ingerlateqqissavarput, Stoltenberg oqarpoq.
Natomi ilaasortat allat saamerlerneersut Stoltenbergitulli eqqarsanngillat sorsunnerlu isornartorsiorlugu.
- Oqallorinnerinuna pissutsinut piviusunut killormoortoq, oqarputimmi Ukraine siumukarnerarlugu, tamannalu ilumuunngilaq, taakku akerliliipput nangippullu:
- Kingullermik maaniinnerniit Ukraine nunap ilarujussuinik annaasaqarpoq, angutit millionit affai toqupput, angutillu pisinnaasut allat pinngitsaalillugit sorsugiartinneqarput, sorsunnerullu taamatut ingerlanera naakkittaatsuliornerujussuuvoq, Clare Dalymik atilik Natomilu ilaasortaq taama issuarneqarpoq.
Natomili generalsekretæri Norgemiuusoq Jens Stoltenberg akivoq, neriuutigineqartumiit sorsunneq arriinnerusumik pisoqarfiusoq Ukrainemmi akiuunnermini ullormut meterinik 100-nik arlalinnik siumukariartalermat sorsunneq aallartimmalli aatsaat taamak siumukariartigaluni.
- Rusland siornatigut nunarsuarmi nukittunerpaat tulliani inissisimagaluarpoq, ullumikkulli Ukraine nunarsuarmi nukittunerpaat tulliannut inissippoq, Jens Stoltenberg oqarpoq.
Sorsunnernut misissueqqissaartarfik RUSI allalluni erseqqissaavoq Ukrainemut saassussineq arriilliartortut, Ukrainemi ullut tallimakkaarlugit 700-t 1200-llu missaanni siumukariartarsimammat.
Taamatuttaaq aggustip naajartornerani Ukrainemiut illersornissamut ministeriat Hanna Maljar oqarluni erseqqissaavoq Ukrainep kujammut illoqarfiisa ilaat Robotyne ammaqqinneqartoq.
