Ukraine Moldovalu EU-mut ilaasortanngorsinnaanissaat akuersissutigineqartoq
Ukraine Moldovalu EU-mi ilaasortanngornissamut piukkunneqalerput.
Nunammi marluk taakku EU-mut ilaasortanngorsinnaanissaat EU-mi nunat 27-t naalakkersuinikkut siuttuisa ippassaq sisamanngornermi akuersissutigaat.
EU-p præsidentiata Charles Michelip Bruxellesimi ataatsimiinnermi tamanna ilisimatitsissutigaa:
- Oqaluttuarisaanermi pingaarutilimmik pisoqarpoq. EU-mut ilaasortanngoriartornersinnut alloriarneruvoq pingaarutilik, Charles Michel allappoq.
EU-Kommissionimi siulittaasup Ursula von der Leyenip ulloq Europamut nuannersutut taavaa:
- Europami akuuvusi. Ullumilu aalajangernerup tamanna takutippaa, Ursula von der Leyen inoqatinut attaveqaammi Twitterimi allappoq.
AAMMA ATUARUK Ukrainep EU-mut ilaasortanngorsinnaanissaa Putinip ajoriffissaqartinngikkaa
Ukrainep EU-mut ilaasortanngorsinnaanissaanut akuersissutigineqarnerani ilaasortanngornissamut utaqqisut akornanni salliutinneqartutut inissisimalerunarpoq.
Ukrainep EU-mut ilaasortanngorsinnaanissaa qaammatialunnguit matuma siornatigut ilimanarsimanngikkaluarpoq. Nunap aningaasarsiornera ingerlalluarpallaanngilaq, EU-mullu ilaasortanngorsinnaanissaa ilimanarpallaarsimanani. EU-mi nunat siuttui taama naliliipput.
Ukrainemili sorsuttoqarnera eqqarsaatigalugu Ukrainemut Ruslandillu præsidentianut Vladimir Putinimut ersarissumik takutitsisoqartariaqartoq, ministeriunerup Mette Frederiksenip Bruxellesimi ataatsimiittoqarnissaanut apuukkami oqaatigaa.
- Europa sumut ingerlaniarnersoq oqaasissaqarfiginngikkaa Putinimut ersarissumik oqaatigineqarpoq, taanna oqarpoq.
Taama nalunaaruteqartoqarnera Ukrainemut qiimmassaataasinnaassaaq:
- Ukrainemiunut maanna sorsuttunut tamanut nutaarsiassatsialaavoq.
- Zelenskyj-p tamanna pillugu ersarissumik oqaatigisareerpaa. Innuttaasut taama tusartinneqarnissaminnut pisariaqartitsipput, Mette Frederiksen oqarpoq.
AAMMA ATUARUK Zelenskyj-p Danmark qutsavigigaa kaammattorlugulu
Naallu Ukraine EU-mut ilaasortanngornissamut piukkunneqaraluartoq, EU-mut ilaasortanngorsinnaanissamut piumasaqaatit suli sukannersuussapput:
- Ukraine Moldovalu EU-mut ilaasortanngorsinnaanissamut qaninneruleraluartut pingaaruteqarpoq ilaasortanngorsinnaanissamut piumasaqaatinik naammassinninnisaq.
- Aap ilaasortanngorsinnaanissamut piukkunneqarput, kisianni ilaasortanngornissamut sivisuumik utaqqisariaqarnissaq naatsorsuutigissavaat, ministeriuneq oqarpoq.
Ukrainelli EU-mut ilaasortanngornissaa qularutiginagu ilanngullugu oqaatigaa.