Ukrainep EU-mut ilaasortanngorsinnaanissaa Putinip ajoriffissaqartinngikkaa

Ukrainep EU-mut ilaasortanngorsinnaanissaa Ruslandip ajoriffissaqartinngilaa.

Ruslandip præsidentia Vladimir Putin, St. Petersborgimi tallimanngornermi oqalugiarami taama oqarpoq.

Ukrainep EU-mut ilaasortanngorsinnaanissaanut piukkunnartutut EU-kommissionimit tallimanngornermi inissinneqareersorlu Putin taama oqarpoq.

- Ajoriffissaqartinngilarput. Aningaasarsiornermut niueqatigiinnermullu tunngasunut ilaasortanngorusunnertik ilaasortanngorusunnginnertilluunniit namminneq aalajangerumaarpaat, Putin oqarpoq.

- Nammineq aalajangissavaat, Ukrainemi innuttaasut namminneq aalajangissavaat, nangilluni oqarpoq.

Ukrainep nunat killiit illersoqatigiiffiannut NATO-mut ilaasortanngornissaa, Ruslandip Ukrainemik februaarip ulluisa 24-anni isaalluni saassussisup akuersaanngilluinnarpaa, russimmi NATO eqqisseqatigiinnissamut akornutaasutut nalilermassuk.

EU NATO-mut naleqqiullugu illersornissakkut iligiinnerunngilaq, russit præsidentiat oqarpoq.

Ukraine EU-mi ilaasortanngortussatut piukkullugu innersuunneqarniartoq, EU-Kommissionip siulittaasuata Ursula von er Leyenip, tusagassiortunik Bruxellesimi tallimanngornermi katersortitsinermi oqaatigaa. Ukrainemiulli inuiaqatigiinni aaqqissuusseqqippata aatsaat tamanna pisinnaasoq aamma oqaatigineqarpoq.

- Ukraine Europamut ilaasortatut isigineqartussatut naleqquppoq. Nuna taanna EU-mut ilaasortanngortussatut piukkunnartutut tikilluaqquneqartariaqarpoq. Tassunga atatillugu suliniuterpassuaqareerpoq, sulili suliarpassuaqarpoq, Urusla von der Leyen oqarpoq.

Nunat EU-mi ilaasortat nunat ataasiakkaat EU-mi ilaasortanngortussatut piukkunnarnersut aalajangertussaavaat. EU-mi nunat naalakkersuinikkut siuttuisa tamanna pillugu Bruxellesimi sapaatit-akunnerisa tulliani ataatsimiinnerminni aalajangiiffigissavaat.