Ukkusissat: Ikiuiartortut Ukkusissanut ippassaq tikipput borgmesterilu aqagu tikissalluni

Ukkusissat eqqaanni sermip iigartartup Perlerfiup eqqaani ajutoortoqarnerata kingorna ikiuigasuartussat Ukkusissanut ippassaq tikipput, borgmesterilu Palle Jerimiassen aqagu tallimanngornermi aamma tikissalluni.
Assi © : Lisa Petersen
Allattoq Mads Lynge
septembarip 12-at 2019 10:29

Uummannap avannaani - Ukkusissat ungasinngisaani ajutoornermut atatillugu sulisut ikiuiartortut Ukkusissanut ippassaq tikipput.

Uummannammi avannaatungaani Ukkusissat ungasinngisaani aalisartut pingasut neqitassanik qaloriitillutik sermeq marlunngornermi unnukkut nakkaammat ajutoorput. Angut ataaseq ajunaarsimasoq nassaarineqarpoq, marlullu suli ujaarineqarlutik.

Umiatsiat marluk ataaseq marlunnik inuttalik aappaalu ataatsimik inuttalik ammassannik qalusitillutik sermip iigartartup Perlerfiup sermiata nakkaanerani umiatsiaat kinngupput.

Uummannamilu isumaginninnermut immikkoortortoqarfimmeersut sulisut sisamat Ukkusissanut ippassaq tikisinneqarput, Avannaata Kommunianilu borgmesteri Palle Jerimiassen Ukkusissanut aallartussanngorluni:

- Taava uanga, annertuumillu pisoqartillugu ikiuigasuartut Ukkusissanut tallimanngornermi aallassaagut. Ukkusissanut ullup ingerlanerani annguttussaassaagut, Palle Jerimiassen KNR-imut oqarpoq.

AAMMA ATUARUK Ajutoorneq: Inuk ataaseq ajunaarpoq marlullu maqaasineqarlutik

Ikiuiartortut angalaqataasussat suna suliarisussaaneraat aperaarput, akivorlu:

- Ilaqutariit eqqorneqarsimasut assigiinngitsut, aammalumi nunaqarfimmiut nalaataqarsimasut oqaloqatigineqarsinnaanissaat taakku suliarissavaat. Pisut tunngavigalugu misigissutsikkut eqqorneqarsimasut ikiorlugillu alloriaqqinnissaannut ikuuttussaassapput, borgmesteri oqarpoq, nangillunilu: Pingaarnertut tassa innuttaasut ikiorneqarnissaat taanna uagutb suliarivarput. Innuttaasut ukualu eqqorneqartut assigiinngitsutigut aamma ikiorserneqarnissaat, Palle Jerimiassen oqarpoq.

- Nunaqarfimmiut tupassimasut uuma pisup qaangerniarnissaanut ikiueqqaarnerit aamma ingerlattussaallutigit.