Ajutoorneq: Inuk ataaseq ajunaarpoq marlullu maqaasineqarlutik

Uummannap avannaani ajutoortoqarnerani inuk ataaseq ajunaarpoq marlullu maqaasineqartutut nalunaarutigineqarlutik.

Kalaallit Nunaanni Politiit taama ilisimatitsipput.

Ajutoorneq sermip iigartartup Perlerfiup eqqaani pisimasoq, kommunefogedip, Knud Amossenip KNR-imut ilisimatitsissutigaa.

Angutit pingasut umiatsiat marluk atorlugit aalisarsimapput. Angutit ammassannik qaloorineranni sermimit iigartartumit mallertitsilersumik nakkaasoqarpoq umiatsiallu kinngutinneqarlutik.

Angut inuusuttoq ajunaarpoq, angutillu marluk allat - aappaa 51-inik ukiulik aappaalu 29-nik ukiliuk suli maqaasineqarlutik.

Maqaasineqartup aappaa 29-nik ukiulik tungujortunik atallaaqarpoq. 51-inik ukiulik saavatigut aappaluttumik tunuatigullu tungujortumik qalipaatilimmik tuiisigut qinngorlugit qaammartartulimmik kavaajaqarpoq.

Sermit iigartartut mianersorneqassasut

Kalaallit Nunaanni Politiit oqarnerat naapertorlugu SAR-imik ujaasineq 21.15 aallartinneqarpoq. Angut inuusuttoq nassaarineqarmat uummammmik aallartitsissut atorlugu uummarsaasoqaraluarpoq, ajoraluartumilli toqusimalluni.

Kalaallit Nunaanni Politiit innuttaasut maqaasineqartunik takunnissagunik politiinut attaveqaqquaat sermillu iigartartut iseqqasinnaanerat pissutigalugu ungasilleqqaneqassanerarlugit.

Politiit naalagaata tulliat, Rune Nielsen tusagassiuutinut allappoq:

- Innuttaasut serminut iigartartunut qanillissanngitsut kaammattuutigaarput, pissutigalugu sermimerngit nakkaasinnaammata taakkulu tassaartitsisinnaallutik.

Issittumi sakkutooqarfiup timmisartuutaa Challenger maqaasineqartunik unnuaq ujaasivoq.

Aammattaaq Issittumi Sakkutooqarfiup umiarsuaa alapernaarsuut, Lauge Koch ujaasinermi sumiiffimmi ujaaseqataalluni. Kiisalu qulimiguulik Bell-212 maqaasineqartunik ujaasisimavoq taannalu Air Greenlandip qulimiguulianik S-61-imik taarserneqassalluni.